Botërori i njollosur i Katarit

2022-11-14 08:42:00, Sport CNA

Është edhe një herë 4 korriku i vitit 1990. Jeni duke parë gjysmëfinalen e Kupës së Botës në divanin e shtëpisë së një shoku tuaj. Në pjesën e parë të ndeshjes, rezultati është ende 0 me 0. Pol Gaskonj, i njohur në nofkën “Gazza”, një futbollist anglez i mbrapshtë, është në kulmin e formës së tij.

Fitorja e Gjermanisë Perëndimore nga goditja e penalltive, duket si një perspektivë e largët. Gjithçka është ende e mundur: për “Gazza-n”, për Anglinë edhe për ju. Botërori i futbollit është një makinë e kohës. Çdo turne ngjall kujtime të edicioneve të mëparshmeve, të miqve të vjetër dhe të së kaluarës, përfshirë autorin e këtyre radhëve, që e kujton me hidhërimin e një adoleshenti 32 vjet më parë.

Edhe pse i detyron fansat të kthehen shpeshherë pas në kohë, i bën ata bashkë nga e gjithë bota. Së bashku ata ndjekin ndeshjet eklektike - siç është ndeshja e parë e këtij edicionit që fillon në Katar më 20 nëntor, Gana-Uruguay - ose përplasjet pikante midis armiqve gjeopolitikë, si për shembull SHBA-ja kundër Iranit.

Nga baret e largëta, sheshet e qyteteve dhe zonat e ndryshme kohore, miliona të panjohur brohorasin në unison pas një goditje të mrekullueshme nga distanca, apo një golI që vjen pas një driblimi dhe që fut në histori emrin e autorit. Me liturgjitë e veta personale dhe bashkësinë mbarëbotërore, Kupa e Botës mund të duket si një lloj feje laike, apo si një komplot i mirë global për një argëtim 4-vjeçar.

Siç mund ta kishte thënë Kafka, po të ishte një tifoz futbolli, ka shumë shpresë, shpresë të pafundme çdo 4 vite, madje edhe për Anglinë. Është një ngjarje e çmuar dhe unike. Ky vit, është i shoqëruara për fat të keq edhe me skandale dhe akte të turpshme.

Autoritetet në Katar, një mbretëri e vogël e Gjirit Persik të pasur me naftë dhe gaz, e kanë mohuar gjithmonë akuzën se e fituan të drejtën për të organizuar botërorin e këtij viti falë ryshfeteve të mëdha që dhanë. Megjithatë zarfet me para janë shpërndarë sa andej-këtej.

Një hetim në SHBA zbuloi se 3 vendimmarrës në FIFA, organi qeverisës i futbollit, ishin korruptuar, edhe pse nuk u përmend se nga kush. Po ashtu hetimet kanë zbuluar konflikte të mundshme interesi që shtrihen nga politika tek transaksionet private, si për shembull 3.2 milionë dollarë që dyshohet se i janë dhënë një drejtuesi të FIFA-s.

Zyrtarët e FIFA-s e anashkaluan vapën e madhe të Katarit gjatë verës, duke e shtyrë nisjen e turneut për këtë muaj, për herë të parë në historinë e këtij kompeticioni. Kështu, futbollistët janë kursyer nga temperaturat përvëluese, por jo mijëra punëtorët e huaj që ndërtuan stadiumet e reja dhe infrastrukturën mbështetëse.

Disa prej tyre kanë vdekur (shifra është e diskutueshme). Shumë të tjerë u paguan shumë keq. Është e vërtetë që pas kritikave të herëpashershme, kushtet e punës në Katar janë përmirësuar, edhe pse jo për të gjithë.

Për t’i dhënë fund iluzionit se organizatorët e këtij botërori janë bërë qytetarë më të mirë globalë, mjafton vetëm të kujtoni një moment tjetër të Kupës së Botës, të asaj që u mbajt në Rusi në vitin 2018. Imazhet e Vladimir Putinit që ndiqte finalen përkrah Emanuel Makron, shkaktuan asokohe reagime të përziera, kurse sot ato duken plotësisht të neveritshme.

Ndërkohë, kriminalizimi i homoseksualitetit nga Katari mund t’i largojë mbështetësit e këtij komuniteti. Disa lojtarë planifikojnë të mbajnë shirita me ngjyrat e ylberit në një qëndrim kundër diskriminimit. Marrëveshje të turbullta, shfrytëzim, paragjykime. Ai që duhet të ishte një festival i harmonisë njerëzore, do të jetë një vitrinë e fatkeqësive ndërkombëtare, por jo më pak i forcimit të autokracisë së naftës.

Dhe ku i lë e gjitha kjo tifozët e zakonshëm të futbollit, nostalgjikët e moshës së mesme për epokën e Gazza-s, Peles apo Maradonës. Ata nuk kanë mundësi të kalojnë kanalin televiziv për të parë Botëror alternativ, më pak të ngatërruar me lidhjet e pushtetit dhe parasë në shekullin XXI-të.

Pra është vetëm ky version ose; këto kujtime të reja ose asnjë të tillë. Disa mund ta injorojnë fare. Të tjerët, përfshirë autorin e këtyre radhëve, do ta kenë të vështirë të heqin dorë nga agonia e penalltive apo mrekullitë e kohës shtesë.

Por ashtu si udhëtimet e gjata në epokën e ndryshimeve klimatike, edhe shijimi i këtij Botërori plot dritëhije, mund të kërkojë një kompensim për ndërgjegjen tuaj, një donacion për një grupim të të drejtave të njeriut, apo një bamirësi kundër korrupsionit. Një ngjarje që shënjon dhe ndriçon miliona jetë, do të përjetohet si e turpshme.

Shumë gjëra mund t`i ndodhin brenda 4 vitesh, një ekipi futbolli, një familjeje apo edhe botës në përgjithësi.

Fytyra të reja mund të shfaqen në mesfushën e kombëtares tuaj, apo pranë jush në divanin e shtëpisë. Ndërsa fytyra të tjera zhduken nga skena, ndoshta përgjithmonë. Mund të goditemi nga pandemitë apo luftërat e reja. Dhe ndërsa jeta mund të japë leksionet të hidhura, njëri prej tyre është se argëtimi është ndonjëherë shumë më pak i pafajshëm nga sa dukej në fillim.

Përkthyer nga CNA.al