Drithërima deri në fund, Milani fiton me gol në minutën e 92-të ndaj Fiorentinës

2022-11-13 20:03:28, Sport CNA

Milani ka siguruar një fitore shumë të vështirë, por të rëndësishme ndaj Fiorentinës duke triumfuar 2-1 në “San Siro” në ndeshjen e fundit të 2022 të kuqezinjve në Serinë A.

MILAN-FIORENTINA 2-1
2′ R. Leao, 90’+2′ (ag) Milenkoviç / 28′ Barak

90’+2’ GOOOL MILANI! Një harkim nga e djathta i Vranks devijohet në portë nga Milenkoviç. Fiorentina proteston për një faull ndaj portierit por pas shikimit me VAR, konfirmohet goli për kuqezinjtë.

89’ Tomori shpëton Milanin nga goli i KO pasi ndal në vijën fatale një gjuajtje te Ikone.

79’ Rafael Leao humb mundësinë me portën bosh, pasi i vjen topi në këmbë pas një devijimi të pafat të Biragit. Sulmuesi çon topin mbi traversë.

72’ Milani përgjigjet në anën tjetër me një tentativë spektakolare të Zhiru, por topi i goditur me “gërshërë” përfundon jashtë, jo shumë larg shtyllës në të djathtë të Terraçianos.

69’ Sulm i shpejtë i Fiorentinës me Joviç, Kalulu mundohet të largojë topin por e nis drejt portës, duke detyruar Tatarushanun të devijojë sferën në këndore.

59’ Ikone niset me shpejtësi në zonë dhe aty është Tomori i cili ndërhyn ndaj sulmuesit dhe largon sferën. Miqtë pretendojnë për goditje nga pika e bardhë pasi pengon sulmuesin para se të prekë sferën. Pas shikimit me VAR, vendoset se nuk është penallti.

52’ Predhë e Leaos nga e djathta, topi devijohet lehtë e përfundon jashtë.

50’ Mrekulli e Terraçiano ndaj gjuajtjes së Zhiru. Portieri kontrollon sferën në dy kohë duke mos lejuar që sfera të kalonte vijën fatale.

45’+2’ Brahim Diaz rrëmben topin nga e djathta dhe gjuan në portë, duke gjetur devijimin e portierit Terraçiano. Sfera i drejtohet rrjetës me Teo Hernandez që ishte gati ta shtynte në portë, por një mbrojtës e largon topin në fundore.

43’ Leao nxjerr Tonali në pozicion për të gjuajtur në portë nga e majta, por mesfushori vonohet dhe pastaj mbrojtësit i zënë rrezen e portës, duke fituar vetëm një goditje këndi.

41’ Është Fiorentina ajo që provon vazhdimisht të gjejë të pavendosur prapavijën e Milanit me kundërsulme të Ikone. Një e tillë i mundëson Mandragora të gjuajë në hyrje të zonës, por ai çon sferën mbi traversë me tentativën e tij.

34’ Fiorentina kërkon penallti pas një prekje të Kalulu ndaj Biragit i cili mbetet i shtrirë në tokë. Gjyqtari dhe më pas edhe VAR konfirmojnë se nuk ka asgjë dhe se mbrojtësi kishte kapur topin.

28’ GOOOL FIORENTINA! Pas një aksioni të gjatë të skuadrës mike, Barak gjuan dhe pas dy devijimesh radhazi, topi i shpëton Tatarushanu i cili e sheh të përfundojë në rrjetë.

8’ Shtyllë! Fiorentina është e pafat teksa gjuajtja e Biragit nga e majta mposht Tatarushanu por ndalet në shtyllën pingule.

6’ Saponara mundohet të befasojë skuadrën e Milanit me një gjuajtje nga jashtë zonës, por nuk gjen katërkëndorin duke fluturuar sferën mbi traversë.

2’ GOOOL MILANI! Sulm i shpejtë i vendasve që gjejnë hapësirë në qendër me R. Leaon i cili nuk gabon dhe kalon skuadrën në avantazh.