Pesë shenjat e depresionit që nuk duhet t’i injoroni

2022-10-15 09:16:00, Shëndeti CNA

Mund të jetë e dhimbshme të shohësh një familjar apo një mik, duke u përballur me probleme të shëndetit mendor. Ja cilat janë disa nga simptomat më të zakonshme të depresionit, të cilat duhet t’iu shqetësojnë, por dhe këshilla se si t’i qëndroni pranë familjarit apo mikut tuaj që mund të jetë duke u përballur me të.

1. Vështirësi për t’u ngritur nga shtrati

Është diçka tërësisht normale të kënaqesh duke fjetur apo të kalosh pak kohë shtrirë në shtrat. Gjithsesi, nëse të duket sikur e ke të vështirë të gjesh motivimin për t’u ngritur nga shtrati apo për t’u përgatitur në mëngjes për të shkuar në punë, kjo mund të jetë një shenjë fillestare e depresionit. Depresioni mund të na bëjë të ndihemi të lodhur dhe të rraskapitur fizikisht, deri në pikën ku edhe detyrat e vogla, si ngritja në mëngjes apo dushi, mund të në duken të lodhshme apo të vështira për t’u kryer.

2. Zakonet e gjumit

Lodhja fizike dhe mendore që vjen me depresionin, mund të ndikojë gjithashtu në zakonet tona të gjumit. Ndryshimet në gjumë mund të shfaqen në shumë mënyra. Ndonjëherë kjo do nënkupton të fjeturit gjatë gjithë ditës, pra përdorimin e gjumit si një mënyrë për të kaluar kohën apo të preferosh gjumin ndaj aktiviteteve të tjera të përditshme.

Herë të tjera, ndryshimet e gjumit mund të krijojnë periudha pagjumësie, të cilat mund ta bëjnë të vështirë të rënien në gjumë apo të qëndruarit në gjumë gjatë natës. Mungesa e gjumit cilësor dhe të qetë, mund të rrisë nivelet tona të ankthit dhe të intensifikojë ndjenjat e shqetësimit. Ndonjëherë, kjo krijon një cikël ku mendimet tona të shqetësuara na mbajnë zgjuar dhe ndikojnë negativisht mbi gjumin tonë, gjë që më pas çon në mendime me akoma më shumë ankth.

3. Ndryshime në oreks

Oreksi dhe zakonet tona të të ngrënit, mund të ndikohen gjithashtu nga depresioni. Disa njerëz mund të kenë një oreks të shtuar, ndërsa të tjerë kanë më pak oreks ose mund të mos jenë fare të uritur. Prandaj nëse vëreni ndryshime tek zakonet tuaja të gjumit, si ato të listuara më sipër, mund të vëreni gjithashtu ndryshime edhe mbi mënyrën e të ushqyerit. Kjo për shkak se gjumi ndihmon në rregullimin e hormoneve të urisë, të cilat na ndihmojnë të frenojmë ngrënien e tepërt, apo të shmangim ngrënien në nivele të pamjaftueshme.

4. Nervozizëm i vazhdueshëm ose luhatje humori

Depresioni mund të na bëjë të përjetojmë shpërthime të nervozizmit dhe luhatje të humorit. Në një moment ndihemi të zemëruar, dy minuta në vonë qajmë në mënyrë të pakontrolluar, ose mbyllemi në vetvete dhe ndihemi fizikisht të mpirë. Luhatjet në humorin tonë mund të ndryshojnë nga njëri moment në tjetrin.

Ndonjëherë këto ndryshime mund të shkaktohen nga sfida të vogla apo të parëndësishme. Por herë të tjera, ato mund të shfaqen befas tërësisht të paprovokuara nga ndonjë gjë. Nëse vëreni një model nervozizmi ose luhatje humori që zgjat më shumë se disa ditë, atëherë kjo mund të lidhet me depresionin.

5. Vështirësi për të përjetuar gëzim, apo për t’u lidhur me njerëzit

Kur jemi në depresion, mund të heqim dorë nga të gjithë kënaqësitë që na dhurojnë gjërat që duam, dhe ta bëjmë më të vështirë lidhjen tonë me njerëzit më të afërt. Ne mund ta fillojmë të humbasim interesin për pasionet personale, miqësitë, detyrat e shkollës, aktivitetet shoqërore, seksin apo jetën në përgjithësi.

Kur zbulojmë se nuk po e shijojmë ose nuk po gjejmë më kënaqësi tek gjërat që shijonim më parë, kjo mund të jetë një shenjë depresioni. Gjithashtu ne mund të izolohemi nga miqtë e ngushtë, anëtarët e familjes ose të tjerët që kujdesen për ne, gjë që mund t’i thellojë simptomat e depresionit.

Përkthyer dhe përshtatur nga CNA.al