Vrasja e ish-kryeministrit japonez/ Jep dorëheqjen shefi i policisë

2022-08-25 16:46:29, Kosova & Bota CNA

Vrasja e ish-kryeministrit japonez/ Jep dorëheqjen shefi i policisë

Shefi i Agjencisë Kombëtare të Policisë në Japoni, Itaru Nakamura

Shefi i policisë së shtetit në Japoni tha të enjten se do të japë dorëheqjen për të marrë përgjegjësinë lidhur me vrasjen e ish-kryeministrin japonez Shinzo Abe gjatë një fjalimi fushate muajin e kaluar.

Njoftimi i shefit të Agjencisë Kombëtare të Policisë, Itaru Nakamura erdhi pasi kjo agjenci publikoi një raport sipas së cilit ishin të metat në masat e sigurisë, që çuan në vrasjen e zotit Abe më 8 korrik në Nara në Japoninë perëndimore.

Zoti Nakamura tha se e dorëzoi dorëheqjen në Komisionin Kombëtar të Sigurisë Publike të enjten.

"Në mënyrë që të rishqyrtojmë në detaje masat e mbrojtjes dhe të mos lejojmë kurrë që kjo të përsëritet, duhet të kemi një sistem të ri," tha zoti Nakamura në një konferencë shtypi ku njoftoi se po jepte dorëheqjen.

Mediat japoneze njoftuan se dorëheqja e tij pritet të miratohet në mbledhjen e kabinetit të së premtes.

I dyshuari për vrasjen, Tetsuya Yamagami, u arrestua në vendngjarje dhe aktualisht është nën vlerësim psikologjik deri në fund të nëntorit. Ai i tha policisë se e kishte vënë në shënjestër zotin Abe për shkak të lidhjes së ish-udhëheqësit me Kishën e Unifikimit, të cilën ai tha se e urrente.

Në një raport hetimor prej 54 faqesh të lëshuar të enjten, Agjencia Kombëtare e Policisë arriti në përfundimin se plani i mbrojtjes për ish-kryeministrin Abe neglizhonte rrezikun që mund t?i vinte atij nga pas dhe ishte përqendruar në rreziqet vetëm gjatë lëvizjes së tij nga vendi ku mbante fjalën tek automjeti i tij.

Deri në momentin kur i dyshuari ishte vetëm 7 metra pas zotit Abe asnjë nga oficerët nuk e kishte diktuar atë dhe as nuk e identifikoi të shtënën e parë si goditje me armë. Në pak më shumë se dy sekonda, i dyshuari ishte vetëm 5.3 metra pas zotit Abe duke e qëlluar përsëri, këtë radhë për vdekje.

Raporti rekomandon rritje të konsiderueshme në trajnim dhe në personelin e mbrojtjes së zyrtarëve të lartë të Japonisë, si dhe rishikimin e udhëzimeve për mbrojtjen nga policia për herë të parë në rreth 30 vjet./ VOA