web counter
LEXO PA REKLAMA!

SHKARKO APP

App Store
Google Play

Skema/ Si përfitoi biznesmeni nga rimbursimet, provat që grumbulloi Prokuroria për zyrtarët dhe përmbaruesin

2023-01-11 17:42:00, Aktualitet CNA
Skema/ Si përfitoi biznesmeni nga rimbursimet, provat që grumbulloi
Arlind Gjokutaj

Prokuroria e Tiranës ka zbardhur skemën që biznesmeni Ilir Thana ka përdorur së bashku me Sekretarin e Përgjithshëm të Ministrisë së Financave, Arlind Gjokutaj, drejtorin e personelit, Fatmir Hoxha dhe përmbaruesin Alban Ruli, për të përfituar shuma të mëdha parash nga rimbursimet.

Prokuroria bën të ditur se Gjokutaj, Hoxha dhe Ruli kanë pranuar shpërblimin e Thanës në vlerën e rreth 82.000.000 lekëve, nga të cilat 50.000.000 lekë të kaluara në llogarinë e biznesmenit.

Ata e kanë trajtuar Thanën si pronar të objeketeve magazinë dhe truall pa qenë në këtë status, si dhe ekzekutuan për herë të dytë një vendim gjyqësor të ekzekutuar nga Ministria e Financave në vitin 2015.

“Nga aktet e këtij procedimi, rezultoi se:

Gjykata e Apelit Tiranë me vendimin e saj nr. 16, datë 14.07.2000 ka vendosur: “Urdhërohet zgjidhja e pasojave për konstatimin e pavlefshmërisë së kontratës së shitjes datë 23.04.1992 të lidhur mes shitësave Drejtorisë së Shërbimit Qeveritar dhe A.K Privatizimit dhe blerësit I.Th, duke i kthyer palët në gjendjen e mëparshme, ku objekti magazinë nr.2 i kthehet Drejtorisë së Shërbimit Qeveritar dhe kjo e fundit së bashku me AKP-në t’i kthejë bleresit I.Th vlerën e objekteve të blera (magazine dhe truall) që është 103.046 lekë të konvertuar me indeksin e rritjes së çmimeve në kohën e ekzekutimit të vendimit”.

Ministria e Financave  dhe Ekonimisë ka ekzekutuar vendimin nr.9150 datë 12.11.1996 të Gjykatës së Rrethit Gjyqësor Tiranë, lënë në fuqi nga Gjykata e Apelit, duke shlyer detyrimin e plotë ndaj kreditorit I.Th sa vlera e objekteve të blera e konvertuar me indeksin e rritjes së çmimeve, bazuar në informacionin e dërguar nga Sektori i Publikimeve në INSTAT. 

Në zbatim të vendimit të mësipërm, nga Ministria e Financave është transferuar në llogaritë në llogaritë e I.Th vlera prej 284.139 me urdhër shpenzimi nr.90 datë 27.02.2015.

Më tej, rezulton se shtetasi I. Th është drejtuar zyrës përmbarimore, e cila në kundërshtim flagrant me ligjin  ka vlerësuar në vitin 2022, objektin magazinë dhe truallin për një vlerë të përgjithshme prej 145.867.920 , duke u hequr dhe trajtuar si ish pronar shtetasin I. Th në një kohë që nuk ka qenë asnjëherë me këtë status”, njofton prokuroria.

Sipas dosjes, dëmi që i është shkaktuar buxhetit të shtetit është rreth 1.200.000 euro.

“Deri në këtë fazë rezulton se Ministria e Financave ka kaluar në favor të shtetasit I. Th. shumën 48.118.366 lekë. Nga kjo shumë është e provuar se 25.000.000 lekë kanë kaluar në favor të shtetases Sh.P.

Organi procedues konstaton dhe çmon se ka dyshime se veprimet e përmbaruesit, të Ministrisë së Financave dhe persona të tjerë, kanë shpërdoruar detyrën duke vjedhur nga Buxheti i Shtetit deri në këtë fazë shumën 48.118.366 lekë dhe tentuar për të vjedhur pjesën e mbetur.

Organi procedues ka urdhëruar sekuestrimin e shumës se kaluar shtetasit I. Th. dhe llogarisë qëllimore të përmbaruesit, duke arritur të sekuestrojë deri në këtë fazë të hetimeve rreth 22.000.000 lekë”, thekson më tej prokuroria./ B.A. - CNA.al





Lajmet e fundit nga