“Mu ngritën qimet përpjetë”/ Ambasadori shqiptar tregon si mësoi për luftën e Rusisë në Ukrainë

2022-10-14 19:40:00, Aktualitet CNA

“Mu ngritën qimet përpjetë”/ Ambasadori shqiptar

Ambasadori i Shqipërisë në OKB, Ferit Hoxha

Ambasadori i Shqipërisë në OKB, Ferit Hoxha, ka treguar se si e ka përjetuar marrjen e lajmit kur Rusia nisi luftën ndaj Ukrainës.

Hoxha zbuloi në emisionin “Ballkan” se në atë kohë ishte duke u zhvilluar mbledhja e Këshillit të Sigurimit, e cila drejtohej nga Rusia dhe e para që e mori fjalën ishte Shqipëria.

Ai tha se nuk e di nëse të tjerët e kanë vënë re, por kur kolegu i tregoi për luftën i janë ngritur qimet e flokëve përpjetë. Ambasadori theksoi se ishin të përgatitur për këtë moment, por nuk donin që të vinte.

Sipas tij, as ambasadori rus nuk ishte në dijeni dhe ekipi i tij e lajmëroi vetëm pak pasi filloi mbledhja.

“Unë kam qenë i këshillit të Sigurimit, kam qenë duke folur dhe meqenëse kishim atë rolin e pendëmbajtësit që gjithmonë mund të flasim të parët dhe unë kisha folur i pari, kishte folur i dyti që ishte SHBA-të. Në momentin që po fliste i treti, nga ekipi im, nga mbrapa më thonë lexo një tëitt që thoshte se sulmi ka filluar dhe ne jemi si të elektrizuar. Nuk e di nëse më janë ngritur flokët përpjetë apo jo, por kam përshtypjen që një pjesë më janë ngritur, sepse ne ishim përgatitur për skenarë të tillë. Në qoftë se do merrej lajmi që sulmi ka filluar ne do të kërkonim edhe njëherë të bënim ndërhyrje sepse ndërhyrjet tona nuk ishin në fokusin e fillimit.

Ne ishim gjithmonë që të mos fillonte, duke paralajmëruar, duke thënë që gjithë qëndrimi ushtarak ka një qëndrim të caktuar, por nuk kishte filluar asgjë. Gjëja më interesante ka qenë se përveçse ne u koordinuam menjëherë me amerikanët, unë nuk kam folur me Tiranën në atë kohë sepse i kisha instruksionet e qarta që nëse do të ndodhte ne do të mbanim këtë qëndrim. Ne do të duhej të përgatisnim edhe njëherë një ndërhyrje për të marrë fjalën në fund, siç e bëmë. Por gjëja më interesante ka qenë që ai që drejtonte seancën që ishte vetë Rusia, ambasadori rus nuk ishte në dijeni dhe ekipi i tij e lajmëron.

Ai lë mbledhjen dhe shkon tek salla e Presidentit për të marrë vesh, për të folur nuk e di se me kë për tu siguruar dhe kthehet dhe lajmëron që Presidenti i Rusisës ka marrë vendimin për të ndërhyrë në Ukrainë dhe bla bla bla. Ishte ndërhyrja më e sikletshme për të, sepse deri atëherë me dhjetëra herë ai pretendonte normalisht siç kanë qenë udhëzimet e tij, që Rusia i ka trupat në territorin e vet, që Rusia ka të drejtë të bëjë çfarë të dojë, që Rusia s’ka asnjë synim të sulmojë, dhe ja ku jemi, Rusia kishte synim për të sulmuar Ukrainën. Ka qenë një moment i frikshëm sepse nuk dinim se çfarë do të thoshte operacion special”, nënvizoi Hoxha./ B.A. – CNA.al