“Varem, po mori Lekët ai”/ Ish-drejtorit i kalojnë 12 pagat sipas gjykatës

2 Tetor 2023, 21:47, Denoncim CNA

“Varem, po mori Lekët ai”/ Ish-drejtorit i kalojnë 12

Në datën 21 Shtator, emisioni investigativ “Stop” në Tv Klan transmetoi një problematikë nga qyteti i Lezhës. Dritan Gega, ish-drejtor i shkollës 9-vjeçare “Pashko Vasa” në Shkodër, u lirua nga detyra në vitin 2020. Ai kishte punuar prej 22 vitesh në arsim.

Pas lirimit nga detyra, Dritani iu drejtua gjykatës dhe Gjykata Administrative e Shkallës së Parë Shkodër vendosi që Dritan Gega të dëmshpërblehej me 12 paga dhe ky vendim përbënte titull ekzekutiv. Gega tha se drejtori i DRAP Lezhë nuk e ekzekuton vendimin me arsyen se çështja është apeluar.

Dritan Gega: Kam punuar në arsimin shqiptar 22 vite. Në vitin 2014-2020, kam punuar drejtor pranë shkollës “Pashko Vasa”, në qytetin e Shkodrës. Në vitin 2020, jam larguar në shkelje flagrante të Kodit të Punës të Republikës së Shqipërisë, nga ish-drejtori Bardhok Pulaj. Gjykata Civile Shkodër e ka marrë çështjen. Një kalvar seancash, e ka kaluar në Gjykatë Administrative. Gjykata Administrative, më datën 15.03.2023 është shprehur: Urdhri i lirimit Dritan Gega, është i paligjshëm dhe kam dëmshpërblimin. Dëmshpërblimi i ka shkuar drejtorit të DRAP-it, drejtorit të ri, Hasan Muça, i cili me arrogancën e tij, as nuk i përgjigjet vendimit të gjykatës, as përmbarimit gjyqësor, as mua si person dhe më ka sjellë dëm shumë të madh. Unë kam tre fëmijë minorenë. Nga emisioni Stop unë kërkoj të më jepet një e drejtë, domethënë është një detyrim kushtetues, ushqimi i fëmijëve.

Më 15 Mars 2023, Gjykata Administrative në Shkodër vendosi që DRAP Lezhë të shpërblejë paditësin me 12 paga për zgjidhjen e kontratës së punës si drejtor i shkollës. Në këtë vendim citohet se përbën titull ekzekutiv dhe duhet të ekzekutohet nga përmbarimi gjyqësor brenda 6 muajve pasi vendimi të marrë formë të prerë. Në vendim thuhet se mund të bëhet ankimim, por se gjykata do të vendosë që vendimi të jepet me ekzekutim të përkohshëm. Kjo do të thotë që vendimi duhet të ekzekutohet menjëherë nga përmbarimi pavarësisht ushtrimit të ankimit nga pala paditëse.

“Stop” foli me Drejtorin e DRAP Lezhë, Hasan Muça dhe punonjësin e burimeve njerëzore, Pashk Alia, të cilët e interpretuan sipas oreksit të vet vendimin e gjykatës. Majde Alia tha se pranon të varet nëse ky ekzekutim është i ligjshëm.

Shefi i burimeve njerëzore: DRAP Lezhë brenda 5 ditëve ka dorëzuar në Gjykatën Administrative të Apelit në Tiranë ankimimin dhe deri në këtë moment nuk kemi shqyrtim nga ana e gjykatës. Kjo do të thotë se nëse nuk do të ma kishte dhënë të drejtën e ankimimit mua.

Gazetarja: Ta jep të drejtën e ankimimit.

Shefi i burimeve njerëzore: Unë pranoj të varem sot nëse ekzekutimi i vendimit në këto kushte është i ligjshëm.

Pas transmetimit në emsionin “Stop”, vendimi i Gjykatës Administrative të Shkallës së Parë Shkodër u ekzekutua dhe pagat kaluan në emër të qytetarit Dritan Gega.

Denoncuesi: Përshëndetje! Pasi u adresova në redaksinë tuaj, ju u paraqitët në DRAP Lezhë. Prezenca juaj bëri që DRAP Lezhë, të zbatojë vendimin e gjykatës. Mua më kaluan pagat. Jam konfuz, ishte i paligjshëm ky vendim për 10 muaj për DRAP-in Lezhë. Për dy ditë, pasi u paraqitët ju në DRAP Lezhë, ky vendim u bë i ligjshëm. Ju falenderoj ju pa masë, se ma zgjidhët problemin tim./ tvklan