LEXO PA REKLAMA!

SHKARKO APP

Analisti ushtarak amerikan: Rusia nuk ka një strategji të mirë për ta fituar luftën

22 Shtator 2023, 08:05, Blog Thore Schröder

Analisti ushtarak amerikan: Rusia nuk ka një strategji të mirë

Që nga fillimi i luftës, analisti ushtarak amerikan Majkëll Kofman, 41 vjeç, ka vizituar disa herë Ukrainën. Kofman ka lindur në Ukrainë dhe në vitin 1991 emigroi në Shtetet e Bashkuara me familjen e tij. Ai është drejtor i Programit të Studimeve për Rusinë në Qendrën për Analizat Detare (CNA), një institucion kërkimor i financuar nga qeveria amerikane.

Në maj, pak kohë para nisjes së kundërofensive ukrainase, Kofman, paralajmëroi mbi sfidat e mëdha që do të krijonin fortifikimet masive të mbrojtjes ruse në juglindje të vendit. Në një intervistë për “Der Spiegel”, ai i bën thirrje Perëndimit të hartojë një strategji afatgjatë për mbështetjen e Ukrainës.

Si po ecën dhe çfarë do të ndodhë me kundërofensivën e ukrainase?

Mua më duket se ajo po hyn në fazën e saj më vendimtare. Aktualisht si rezervat e Ukrainës ashtu edhe rezervat strategjike ruse janë hedhur që të gjitha në fushën e betejës. Prandaj, kjo do të varet nga pala që është më e aftë të menaxhojë forcat e veta, duke ruajtur trupat dhe municionet.

A do të arrijnë ukrainasit të thyejnë të tria linjat mbrojtëse ruse gjatë javëve të ardhshme?

Tani për tani, forcat ukrainase po shënojnë një përparim të qëndrueshëm. Ka shumë debate mbi ndikimin e mundshëm të motit në stinën e vjeshtës. Synimi i kësaj ofensive nuk është vetëm të depërtohet tek linjat mbrojtëse ruse, por t’i imponohet Rusisë një disfatë vendimtare, duke çliruar një pjesë të konsiderueshme të territorit.

Analisti ushtarak amerikan: Rusia nuk ka një strategji të mirë

Çfarë nënkuptoni me këtë të fundit?

Unë nuk e di se si do ta vlerësojnë qeveria ukrainase dhe vendet perëndimore. Por qëllimet fillestare të ofensivës duket se kanë qenë çlirimi i Melitopolit, prishja e linjave tokësore ruse të komunikimit që kalonin pranë vijës bregdetare dhe mbërritja deri në bregun e Detit Azov. Por këto janë synime maksimaliste.

Sa shanse ka të arrihen qëllimet fillestare?

Unë mendoj se ekziston një mundësi reale që forcat ukrainase të thyejnë linjat ruse. Sigurisht, dinamika ka ndryshuar disi 2 javët e fundit. Dhe operacionet ushtarake, mund të vazhdojnë edhe në mënyrë jo-lineare. Nëse ushtria ruse është e rraskapitur dhe s’ka më shtesë trupash, kjo mund t’i vendosë forcat ruse në një pozitë të pasigurt.

Kohët e fundit disa zyrtarë amerikanë janë shprehur kritikë ndaj mënyrës se si po luftojnë ukrainasit. Ata thonë se ukrainasit po i shpërndajnë forcat e tyre në shumë pjesë të frontit, dhe po luftojnë në grupe të vogla këmbësorie, në vend se të përdorin njësi më të mëdha të motorizuara...

Një pjesë e mirë e kritikave vjen nga mos-kuptimi se si funksionojnë forcat ukrainase apo e kushteve në fushën e betejës. Gjendja në terren nuk mundëson një grumbullim efektiv të forcave.

Analisti ushtarak amerikan: Rusia nuk ka një strategji të mirë

Çfarë u mungon sot ukrainasve?

Pajisjet për depërtimin e shpejtë në zonat e minuara. Po ashtu, ka mungesa në mbrojtjen ajrore me rreze të shkurtër, dhe kjo i ka bërë trupat ukrainase shumë të brishta ndaj sulmeve të helikopterëve ushtarakë rusë. Nga ana tjetër kjo ofensivë nuk ka vuajtur nga mungesa e mjeteve të blinduara luftarake apo tankeve. Problemet ishin më shumë në aspektin e teknologjisë ndihmëse dhe më e rëndësishmja në atë të trajnimit.

Siç e pamë, trajnimi ishte i pamjaftueshëm, duke pasur parasysh edhe kohën në dispozicion.

Në SHBA po diskutohet nëse do të dërgohen apo jo në Ukrainë raketat me rreze të gjatë ATACMS. Ndërkohë, politikanët gjermanë po debatojnë nëse do të ofrojnë raketat Taurus. Sa të rëndësishme mund të jenë ato për javët e mbetura të ofensivës?

Do të ishte një zhvillim pozitiv, por them se do të ishte mirë që këto armë të ishin dërguar që në maj apo qershor. Për më tepër, ka rëndësi se cili version i ATACMS do të dërgohet.

Analisti ushtarak amerikan: Rusia nuk ka një strategji të mirë

Si do të vazhdojë kjo luftë pasi të përfundojë ofensiva?

Mendoj se të hyjmë në një periudhë të zgjatur të rënies së intensitetit të luftimeve gjatë vjeshtës dhe dimrit, në të cilën të dyja palët do të konsolidojnë pozicionet e tyre, duke u përpjekur t’i bëjnë presion kundërshtarit të tyre. Ndoshta do të kemi një situatë të ngjashme me atë që ishte situata gjatë dimrit të kaluar.

Cila është strategjia e Rusisë në këtë fazë të luftës?

Analisti ushtarak amerikan: Rusia nuk ka një strategji të mirë

Që ta zgjasë sa më shumë luftën dhe ta bëjë atë më të kushtueshme. Vitin e ardhshëm, ata do të përpiqen të fokusohen tek shkatërrimi i qëndrueshmërisë së Ukrainës si shtet. Ata shpresojnë se mund ta shterojnë ngadalë vullnetin politik të Perëndimit. Por Rusia nuk ka një strategji të mirë për të fituar luftën.

Analisti ushtarak amerikan: Rusia nuk ka një strategji të mirë

Forcave të saj u mungon potenciali sulmues. Mundësia për të pushtuar më shumë territor ukrainas është shumë e vogël, madje edhe për të arritur qëllimet më minimale të luftës për të pushtuar Donbasin. Por udhëheqja ruse nuk ka hequr dorë nga qëllimi i saj për të shkatërruar Ukrainën. Dhe për këtë do të shpenzojë shumë burime.

Marrë me shkurtime

Lajmet e fundit nga