E fundit!

13:13 Politikë

"Protestat arritje e madhe"/ Rama: Shqipëria e para në rajon për performancën mjedisore, e 46-ta në botë

Kryeministri Edi Rama në një postim të bërë në rrjetet soc...

Vrasja e gjyqtarit/ Shoqata e Avokatëve: Sulm i drejtpërdrejtë ndaj vetë rendit kushtetues

6 Tetor 2025, 21:01, Aktualitet CNA

Vrasja e gjyqtarit/ Shoqata e Avokatëve: Sulm i drejtpërdrejtë

Shoqata e Avokatëve Penalistë të Shqipërisë, përmes kryetares Joana Qeleshi, ka reaguar lidhur me vrasjen e gjyqtarit Astrit Kalaja.

Nëpërmjet një postimi në rrjetet sociale, Qeleshi shprehet se ngjarja është e papranueshme dhe paraqet një sulm të drejtpërdrejtë ndaj vetë rendit kushtetues.

Postimi i plotë nga Joana Qeleshi:

Ngushëllimet më të sinqerta familjes, miqve dhe kolegëve!

Kjo ngjarje, e pa precedentë në historinë shqiptare dhe e papranueshme në një vend demokratik, ngre alarmin mbi mungesën e sigurisë në institucionet gjyqësore dhe aktorët e drejtësisë si gjyqtarët, prokurorët dhe avokatët.

Dhuna ndaj aktorëve të sistemit të drejtësisë, qoftë fizike apo verbale paraqet një sulm të drejtpërdrejtë ndaj vetë rendit kushtetues dhe parimeve mbi të cilat mund vetëm të ngrihet shteti i së drejtës.

Gjuha agresive ndaj gjyqtarëve, prokurorëve dhe avokatëve në jetën publike nuk mund të vijojë të gjejë më hapësirë në kulturën e një vendi të civilizuar, duke ushqyer manifestime dhune, të cilat venë në dyshim zhvillimin dhe respektimin e çdo vlere njerëzore.

Marrja e jetës së një gjyqtari, brenda mureve të gjykatës, vendi që prezumohet të ofrojë sigurinë e padiskutueshme ligjore dhe njerëzore të ruajtjes dhe konsolidimit të drejtave dhe lirive të çdo individi dhe personi, godet rëndë shoqërinë dhe shtetin në tërësi.

Sot, dhuna nuk mori vetëm jetën e një njeriu dhe një profesionisti të nderuar të drejtësisë, por goditi simbolin e zhvillimit mbarëshoqëror të një vendi i cili ka punuar e po punon ndër dekadda të distancohet bindshëm prej saj.

Shoqata e Avokatëve Penalistë u bën thirrje institucioneve përgjegjëse të ndërmarrin menjëherë masa efektive për trajtimin e rastit, garantimi e sigurisë së të gjithë aktorëve të drejtësisë, si dhe të kryejnë të gjitha veprimet e nevojshme për nxitjen e një kulture respekti ndaj figurës së tyre.

Drejtësia mund të ekzistojë vetëm në një mjedis të sigurt, të respektuar dhe të lirë nga frika!

U prehsh në paqe Gjyqtar Astriti!/CNA