Votimi elektronik/ Celibashi: Nuk zgjidh problemin e shitblerjes së votës

27 Shkurt 2024, 11:50, Aktualitet CNA

Votimi elektronik/ Celibashi: Nuk zgjidh problemin e shitblerjes së

Kreu i KQZ-së, Ilirjan Celibashi, gjatë fjalës së tij në Komisionin për Reformën Zgjedhore, i cili po zhvillohet "online", ka folur për votimin elektronik.

Celibashi ka theksuar se duhet marrë një vendim politik sa i takon shtrirjes së votimit elektronik në të gjithë territorin.

Kryekomisioneri nënvizon se votimi elektronik ka kosto shumë të larta, si dhe kërkon burime njerëzore.

"Procedurat dhe afatet për nxjerrjen e rezultateve. Është krijuar një traditë pozitive për ankimimin, por kam idenë që në aspektin teknik duhet të kemi disa rregullime në ankimime. Sanksionet administrative, ka nevojë për t’u riparë, në disa raste janë joproporcionale dhe pa sens.

Për disa shkelje të rënda, masa e sanksionit administrativ është krejt e papërfillshme. Nuk është shumë me vend që për strukturën organike të KQZ-së të angazhohet Kuvendi, edhe pse ai garanton integritet, por ka nevojë të rishikohet për ta bërë më fleksibël.

Votimi elektronik do duhet të merret një vendim politik më së pari. Ka vullnet për të shtrirë bazuar në eksperiencën e deritanishme. Në një lloj mënyre si komisioner, edhe brenda KQZ kemi pikëpamje të ndryshme, edhe unë e mbështes në parim shtrirjen më gjerë të votimit elektronik nga sa ne jemi duke e aplikuar.

Nuk jam shumë i bindur që duhet ta shtrijmë menjëherë në gjithë territorin, por nëse politika dakordësohet dhe thotë po, ka dobi që të shtrihet në gjithë territorin, do duhet të mbani në vëmendje dy faktorë, kostot dhe faktorin njeri. Në lidhje me njerëzit që do merren me aspektin teknik të zhvillimit të këtij procesi.

Edhe pse pati deri diku kontestime të forta në lidhje me zhvillimin e votimit elektronik, veçanërisht në Elbasan, nga verifikimi patëm përputhshmëri 100% me fletët e votimit dhe votat digjitale.

A do të bënte sens në rastin e përdorimit të pajisjeve angazhimi i komisionerëve vetëm partiak? Çfarë kuptimi do ketë që ata njerëzit aty të jenë vetëm politikë. Faktori njeri është shumë i rëndësishëm sepse mund të shkatërrojë procesin, ndaj duhet që ne si KQZ të gjejmë njerëzit e duhur, na duhen njerëz që t'i gjejmë deri tani", tha Celibashi.

Nga ana tjetër Celibashi deklaron se votimi elektronik nuk zgjidh çdo problematikë, për shembull jo atë të shitblerjes së votës.

“A mos duhet të rishikojmë edhe numrin e qendrave të votimit? Ne jemi duke bërë një ushtrim për të parë se sa efektivisht përdoret pajisja në çdo QV, mendoj që ka sens që në zonat urbane, edhe pse QV janë me 1000 votues, votojnë 300-400.

Votimi për ata që jetojnë jashtë, duhet të adresohet në mënyrë tjetër. Pra, nëse do bëjmë votim elektronik, duhet të ulim numrin e QV. Ndaj mendoj që vendimi për votimin elektronik, është i vështirë. Pra, nuk të zgjidh çdo problematikë. P.sh. votimi elektronik, nuk të zgjidh të gjitha problemet: p.sh. jo atë të shitblerjes së votës”, tha Celibashi./ CNA