web counter
LEXO PA REKLAMA!

SHKARKO APP

App Store
Google Play

Thellohet skandali te Trauma/ Ilaçe të skaduara dhe pa vulë, mbi 1500 operacione të padokumentuara

12 Shtator 2023, 14:38, Aktualitet CNA

Thellohet skandali te Trauma/ Ilaçe të skaduara dhe pa vulë,

Thellohet më tej skandali në Spitalin Universitar të Traumës (SUT).

Në raportin e fundit të Kontrollit të Lartë të Shtetit është zbuluar se në magazinën e farmacisë së spitalit të Traumës, gjendet një stok i medikamentesh dhe materiale mjekimi të skaduara.

“Nga dokumentacioni i vendosur në dispozicion dhe të dhënat e marra nga sistemi informarik SIIS, konstatohet se deri në fund të periudhës së auditimit në magazinën e farmacisë së SUT, gjendet një stok i konsiderueshëm medikamentesh dhe materiale mjekimi të skaduara, të shkaktuara si pasojë e planifikimit dhe menaxhimit joeficient nga strukturat përgjegjëse të SUT dhe kërkesave të shefave të shërbimit. Nga të dhënat e marra nëpërmjet programit informatik të farmacisë SIIS, më datë 06.02.2023 në magazinën e farmacisë së SUT u gjendën barna te skaduara. Si pasojë e planifikimit dhe keqmenaxhimit përgjatë vitit 2021 dhe 2022 kanë skaduar dhe janë gjendje në farmacinë qendrore të SUT barna në vlerën totale 2,014,241 lekë.”

Përveç barnave të skaduara në farmacinë qendrore, barna të skaduar janë gjetur dhe në shërbime.

“Përveç barnave të skaduara në farmacinë qendrore një sasi e konsiderueshme e barnave të skaduara gjendet dhe në shërbime që kap vlerën 7,261,179 lekë. Në magazinën e farmacisë së SUT dhe në pavijone deri në fund të periudhës së auditimit, gjendet një sasi me medikamente të skaduara në vlerën totale 9,275,420 lekë, e cila përbën një shpenzim joeficient për SUT duke sjellë një efekt financiar negativ për buxhetin e shtetit.”

KLSH raporton se nga drejtuesit e institucionit nuk janë marrë masat e nevojshme për moskrijimin e stokut të barnave dhe materialeve të skaduara.

Gjithashtu në Farmacinë qendrore të SUT-së gjendej një sasi e madhe e medikamenteve që nuk kishin vulën e kuqe.

“Në Farmacinë qendrore të SUT-së gjendej një sasi e madhe e medikamenteve që nuk kishin vulën e kuqe me mbishkrimin “për përdorim spitalor ndalohet shitja”, pasi bazuar në pikën 1 të Urdhrit nr. 287 datë 12.07.2022 të MSHMS parashikohet se: Barnat që qarkullojnë në sistemin shëndetësor publik përveç pullës se sigurisë duhet detyrimisht të jenë të vulosura edhe me vulën me mbishkrimin” Përdorim Spitalor-Ndalohet Shitja. Magazina e mallrave të SUT nuk plotëson në asnjë drejtim kushtet e ruajtjes së barnave."

Një tjetër shkelje e rëndë e zbuluar nga KLSH është se mbi 1500 operacione janë të padokumentuara.

“Nga drejtoria e SUT, të analizohet dhe të nxirren përgjegjësi për mosdokumentimin në regjistrat e mbajtur në bllokun operator qendror të materialeve ortopedike të përdorura gjatë ndërhyrjeve kirurgjikale, pasi për vitin 2021 nga ana e bllokut operator qendror, nuk janë dokumentuar 667 operacione dhe 811 për vitin 2022.”/ CNA





Lajmet e fundit nga