Task-forca e ujësjellësit në terren në Shkodër/ Inspektorët e AKUK-së: Penalitete për shkelësit e ligjit

29 Tetor 2025, 14:54, Aktualitet CNA

Task-forca e ujësjellësit në terren në Shkodër/

Task-forca e shoqërisë rajonale të Ujësjellës-Kanalizimeve në Shkodër po zhvillon kontrolle në të gjitha subjektet, por edhe abonentët. Këto kontrolle janë duke u zhvilluar në bashkëpunim me task-forcën e Agjencisë Kombëtare të Ujësjellësit lidhur me debitë e prapambetura, lidhjet e paligjshme në rrjet dhe implementimin e impianteve për trajtimin e ujërave të ndotura.

“Task-forca e AKUK ndodhet në mbështetje të task-forcës së Ujësjellës-Kanalizime në lidhje me inspektimin në terren të subjekteve ose abonentëve, të cilët rezultojnë me lidhje të jashtëligjshme si dhe me debi të prapambetura. Gjithashtu do të kontrollohen të gjitha subjektet që kanë detyrimin ligjor që të bëjnë implementimin e impiantit të trajtimit të ujërave të ndotura”,-tha Greta Fasko, Inspektore e Task-Forcës, AKUK.

Task-forca e ujësjellësit në terren në Shkodër/

Inspektorja e Task-Forcës ka edhe një apel për të gjitha subjektet dhe abonentët që mund të kenë shpime që ta ndajnë rrjetin e tubacioneve nga ai i ujësjellësit për të shmangur gjobat e mundshme.

“Subjektet apo abonentët që përdorin ujin e rrjetit dhe ujin me shpim, kanë detyrimin ligjor që të tregohen të kujdesshëm që të bëjnë ndarjen e tyre, pra që të mos ketë një kryqëzim të rrjetit në mënyrë që të shmangin masat administrative”,-tha Fasko.

Task-forca e ujësjellësit në terren në Shkodër/

Qëllimi kryesor nuk është gjobvënia, por bashkëpunimi me subjektet dhe abonentët familjarë.

“Task-forca do të jetë vazhdimisht në territorin e Bashkisë Shkodër për inspektime të mëtejshme pasi qëllimi ynë kryesor nuk është vendosja e masave administrative, por bashkëpunimi i ngushtë me qytetarët dhe ndërgjegjësimi i tyre”,-shtoi inspektorja.

Task-forca e AKUK Shkodër, së bashku me grupet nga Tirana do të vijojnë këto kontrolle pa ndërprerje në të gjitha zonat e Qarkut Shkodër për një përdorim sa më të mirë të ujit si dhe ndalimin e të gjitha shkeljeve të mundshme në rrjetin e ujësjellësit./CNA