Kreu i KLSH-së: Një punonjës tha se duhet kërkuar mbështetje ndërkombëtare për të audituar punën e kryeministrit

29 Tetor 2025, 13:40, Aktualitet CNA

Kreu i KLSH-së: Një punonjës tha se duhet kërkuar

Kreu i KLSH-së, Arben Shehu, ka raportuar sot në seancën e përbashkët të Komisionit të Ekonomisë dhe Komisionit për Nismat Qytetare, veprimtarinë e institucionit për vitin 2024.

Gjatë përgjigjeve për pyetjet e deputetëve, Shehu tha se ka hasur shqetësime nga audituesit për kryerjen e procesit të auditimit.

Ai tregoi se një nga punonjësit e KLSH-së ka shprehur shqetësime për të audituar punën e kryeministrit. Ai shton se audituesit kërkojnë ndihmën e ndërkombëtarëve që t’u jepet mbështetja e duhur për të kryer auditimet.

"Kur e kam marrë detyrën jam hasur në momentet e para me kërkesën e një audituesi, i cili më ka shfaqur një shqetësim në punën audituese. Më ka kërkuar, ka qenë pjesë e stafit auditues në Ministrinë e Jashtme, në atë periudhë drejtohej nga zv/ministri z.Cakaj dhe audituesi më ka shprehur pamundësinë për të adresuar gjetjet, konstatimet tona te ministri. I kam kërkuar shpjegime, një lloj sqarimi të shqetësimit dhe më ka thënë që nuk është problemi që ne të adresojmë te personat përgjegjës, të cilët kishin vlerësuar si përgjegjës të shkeljeve të mundshme. Më është përgjigjur se shqetësimi nuk është transmetimi te Cakaj, por mungesa e mundësisë për t’ia transmetuar gjetjet kryeministrit sepse ai duhet të jetë autoriteti drejtues në Ministrinë e Punëve të Jashtme.

Unë si drejtues institucioni kam qenë i detyruar të sqaroj dhe të jap një lloj logjike me një kujdes në radhë të parë njerëzor dhe institucional, për shkak të situatave të tjera që kanë pasuar, punonjësi është larguar nga institucioni dhe për rrethanat e largimit unë jam i gatshëm që t’ju vë në dispozicion jo vetëm praktikën, por t’ju relatoj germë për germë historinë e problematikave që ka mbartur.

Në vazhdimësi më ka dërguar shkresa të ndryshme, por një rast konkret ku më ka kërkuar në letrën që më është drejtuar është shprehur që unë dhe jo vetëm unë do t’u kërkojmë institucioneve ndërkombëtare që mua personalisht (Kryetarit të KLSH) t’i jepet mbështetja e duhur për të audituar punën e Kryeministrit të Republikës së Shqipërisë sepse unë kam mundësi për shkak të frikës që të auditoj punën e kryeministrit. Tani unë çfarë duhet të bëj në këto lloj situatash. Këto janë raste konkrete, unë i vlerësoj të gjitha. Unë e fus veten tek ata individë që në radhë të parë i kam frikën Zotit dhe zbatimit të ligjit dhe deri në minutën e fundit do të jem pjesë e do të drejtoj KLSH-në me korrektesën më maksimale. Këtë e them me përgjegjshmëri të plotë dhe përballem në çdo moment", tha Shehu. /CNA