Shqipëria dhe Britania nisin marrëveshjen për transferimin e të burgosurve/ Anglia do të paguajë shpenzimet

24 Maj 2023, 08:31, Aktualitet CNA

Shqipëria dhe Britania nisin marrëveshjen për transferimin e

Shqipëria dhe Britania e Madhe do të fillojnë të zbatojnë marrëveshjen për transferimin e të burgosurve shqiptarë në Shqipëri.

200 të burgosur shqiptarë të cilët vuajnë dënimin në burgjet e Anglisë dhe Uellsit do të kthehen në Shqipëri brenda dy viteve dhe do të kryejnë pjesën e dënimit të mbetur në Shqipëri.

Ministria e Drejtësisë Angleze ka bërë me dije se do të jetë Britania ajo që do të paguajë kostot e të burgosurve përgjatë gjithë kohëzgjatjes së dënimit të tyre në vendin tonë dhe Shqipëria do të mund të rrisë investimet për përmirësimin e mëtejshëm të kushteve në sistemin e burgjeve.

Ky vendim ka ardhur pasi ministri i Drejtësisë, Lord Ballamy KC tha në Parlament se burgjet janë tejmbushur dhe kapaciteti ka shkuar deri në 99%.

Ai tha se Qeveria është e shqetësuar për rritjen e numrit të burgosurve dhe se si ajo po i afrohet kufirit të saj të sipërm.

Ministria e Drejtësisë tha se marrëveshja e re do të “lirojë” hapësirën e burgjeve në Angli dhe Uells dhe do të dyfishojë numrin e shkelësve pa nënshtetësinë e Mbretërisë së Bashkuar të hequr çdo vit.

"I jam mirënjohës homologut tim shqiptar, Ulsi Manja, për përpjekjet e tij për të formuar partneritetin tonë në rritje për çështjet e drejtësisë. Publiku pret që kriminelët e huaj duhet të vuajnë dënimet e tyre jashtë shtetit, jo në burgjet tona në kurriz të taksapaguesve. Bashkëpunimi me partnerët tanë ndërkombëtarë është një pjesë thelbësore për ta bërë këtë të mundur", tha Sekretari i Drejtësisë Alex Chalk.

Ndërkohë, ministri i Drejtësisë së Shqipërisë, Ulsi Manja, mësohet t’i ketë thënë se kjo marrëveshje e re demonstron partneritetin e fortë midis qeverisë së Mbretërisë së Bashkuar dhe asaj shqiptare.

“Dy vjet pasi u ratifikua marrëveshja për transferimin e të burgosurve nga Mbretëria e Bashkuar në Shqipëri, ne kemi përfunduar një marrëveshje teknike nga e cila do të përfitojnë të dyja vendet.

Në thelbin e tij, çdo të dënuari shqiptar në Mbretërinë e Bashkuar do t’i jepet mundësia për të vuajtur dënimin e mbetur në Shqipëri, pranë familjeve të tyre, ndërkohë që shtojmë përpjekjet tona për të siguruar modernizimin e sistemit penitenciar shqiptar”, tha ai.