E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Fshirësi nuk zhduk dot historinë

23 Maj 2023, 21:48, Aktualitet CNA

Ndryshimet pas restaurimit te Mozaikut

Mozaiku “Shqipëria”, siç e quan kryeministri Rama, në postimin e tij të pak ditëve më parë në rrjete sociale, është restauruar i gjithë, gurë pas guri, pllakëz pas pllakëze. Është restauruar, por ka pësuar edhe ndryshime.

Ky është një nga ato rastet, kur dikush merr fshirësin dhe kërkon të fshijë historinë e një vendi. Me disa detaje: Është hequr ylli, janë bërë ndryshime mbi disa nga pamjet e njerëzve që kanë simbolizuar punën në kohën e diktaturës. Dhe këto në kuadër restaurimesh apo qëndrimesh politike, pas 30 vjetësh të demokracisë sonë të deformuar pseudo-kapitaliste.

Në fakt, është bërë me fondet e BE-së, por kush e ka miratuar fshirjen e historisë së Shqipërisë?

Jonila Godole në një qendrim të saj, theksonte se Bashkimi Evropian kishte paguar restaurimin e një falsifikimi. Ishte bërë një falsifikim. Po, është e vërtetë! Është falsifikuar historia e Shqipërisë.

Mozaiku para restaurimit

Përse do vijnë të huajt në Tiranë kur të shikojnë mozaikun? Çfarë do të tregojë nga e shkuara? Ku janë punëtorët e së shkuarës? Ku është ylli, që tregon se ky vend ka qenë komunist. Pse zhduket çdo gjë? A nuk duhet ruajtur?

Kryeministri Rama ktheu “Bunk’artet” e famshme, që i ka marrë Carlo Bollino. Ktheu edhe “Shtëpinë e Gjetheve”, për të treguar për të shkuarën dhe historinë. Dhe nga ana tjetër, shkon tek muzeu dhe mozaikut i hiqet ylli, apo deformohet punëtori i kohës së diktaturës.

"Shtëpia e Gjetheve"

Duke prishtur shtëpitë e vjetra të Tiranës, duke restauruar pazaret, duke i bërë moderne, duke ngritur kulla, pas 20 vjetësh në Tiranë kur të vijnë turistët dhe fëmjët e emigrantëve shqiptarë do e shikojnë Tiranën si një qytet me kulla të zhvilluar dhe ku është zhdukur e fshirë e gjithë historia e qytetit.

Jo, kjo nuk mund të jetë e tillë! Vlerat historike ruhen, edhe ato të diktaturës. Nuk mund të fshihet me një fshirës dhe me një të rënë lapsit çdo gjë.

Duhen ruajtur disa vlera ashtu siç kanë qenë, që edhe turistëve të huaj t’ju shpjegohet se çfarë është ai mozaik.

Duhen ruajtur edhe objektet, pikërisht siç është “Shtëpia e Gjetheve” apo ndonjë tjetër, mjete të kohës, pse jo duhet të ketë edhe muze për pjesën e errët të asaj historie, ashtu sikundër mund të ketë muze dhe për ato vlera siç janë hidocentralet përshembull, që janë ndërtuar me djersën e shqiptarëve, por janë pasuri kombëtare sot pas 50 vjetësh, 60 vjetësh.

Mozaiku para dhe pas restaurimit

Nuk i fshin dot kush me fshirës. Nuk është çështja për të mbajtur një yll për të treguar nëse je apo nuk je komunist.

Nuk bëhesh antikomunist se fshive yllin, as komunist se vure yllin në ballë. Ai yll në flamur është pjesë e historisë së Shqipërisë, ka qëndruar për shumë dekada dhe askush nuk mund ta fshijë.

Ajo është një vepër arti e ndërtuar e tillë. Jo çdo gjë duhet prishur me fshirës në dorë sepse duke fshirë pak nga pak çdo gjë të së shkuarës, harrojmë atë se ku kemi qenë, nga vijmë dhe nuk e kuptojmë fare, por marrim edhe një rrugë pa krye për atë ku po shkojmë.

Fëmijët nesër duhet ta dinë të shkuarën, duhet ta dinë historinë, duhet ta dinë çfarë është ai mozaik, duhet ta dinë çfarë ka qenë Sigurimi i Shtetit, çfarë ka qenë diktatura, diktatori, ngjarjet e kohës sepse nuk ka një histori as të zezë, dhe as gri, as të kuqe dhe as blu.

Mozaiku para restaurimit

Historia është me të zezat dhe me të bardhat e saj në çdo kohë, pavarësisht se kush është më e madhe nga të dyja. Janë historia e vendit historia e kombit, siç ka vendi në gjurmët e tij edhe tradhtarë, ka edhe patriotë, ka edhe diktaturë, ka edhe demokraci, ka edhe flamur me yll, ka edhe flamur pa yll.

Prandaj, veprimi që është bërë mbi mozaikun në muze është një akt i shëmtuar dhe në dëm të historisë së vendit dhe për këtë janë përdorur fondet e Bashkimit Europian.

Dikush në BE, në rast se do ta konstatojë këtë fakt do të skandalizohej se me këtë fshirjen që ne i bëjmë historisë, gjermanët duhet të kishin fshirë holokaustin, duhet të kishin fshirë çdo gjurmë të luftës, në lindje do ishte zhdukur çdo gjurmë e komunizmit.

Jo, i kanë atje dhe i ruajnë, i kanë asete muzeale, i tregojnë, ia mësojnë më të rinjve për të mos u kthyer më tek e shkuara e gabuar, por edhe për të mos gabuar duke ecur përpara./ CNA.al