Raporti për vitin 2022/ Artur Metani: Janë hetuar 41 magjistratë

7 Qershor 2023, 21:30, Aktualitet CNA

Raporti për vitin 2022/ Artur Metani: Janë hetuar 41 magjistratë

Inspektori i Lartë i Drejtësisë, Artur Metani

Inspektori i Lartë i Drejtësisë, Artur Metani paraqiti para Komisionit për Çështjet Ligjore raportin vjetor të punës së institucionit gjatë vitit 2022.

Metani tha se gjatë vitit 2022 u trajtuan 1715 ankesa, ndërsa prioritet i janë dhënë edhe ankesave të vjetra.

Ai theksoi se ILD do të mundohet të mbyllë ankesat e prapambetura, por evidentoi se mungesa e inspektorëve e pengon punën.

“Natyrisht periudha e raportimit është për vitin 2022, por unë mendoj se është e rëndësishme t’ju raportoj faktin se sot nga të prapambeturat numri është 345 ankesa dhe ne me ritmin që po ecim mendojmë që deri në fund të 6-mujorit ne heqim dhe çështjen e ankesave të prapambetura. Deri në fund të vitit po përpiqemi heqim dhe ankesat e vitit 2020-2021, po arritëm sepse mungesa e burimeve në inspekto bën dhe të vetën”, u shpreh ai.

Përsa i përket hetimeve disiplinore, Inspektori i Lartë i Drejtësisë tha se ka miratuar 28 vendime për hetimin me 41 magjistratëve.

“Referuar këtyre parashikimeve ligjore, gjatë vitit 2022 Inspektori i Lartë i Drejtësisë pasi konstatoi ekzistencën e dyshimeve të arsyeshme, ka miratuar 28 vendime për hetimin disiplinor, me anë të të cilave janë hetuar shkeljet e pretenduara ndaj veprimtarisë së 41 magjistratëve. Hetimi disiplinor për 3 subjekte ka filluar me iniciativë, për 38 subjekte mbi bazë ankese.

Rezultatet e hetimit janë si vijon:

· për 6 magjistratë10 (3 gjyqtarë dhe 3 prokurorë) janë paraqitur pranë këshillave respektive kërkesat për procedim;

· për 1 magjistrat (1 gjyqtar) është pezulluar hetimi deri në marrjen e një vendimi përfundimtar për procesin e rivlerësimit;

· për 22 magjistratë (20 gjyqtarë dhe 2 prokurorë) është mbyllur hetimi disiplinor për shkak të: i) mbarimit të statusit të magjistratit; ii) vlerësimit të fakteve, rrethanave të hetuara dhe provave të marra, si të pamjaftueshme për të provuar shkeljet e pretenduara.

· për 14 magjistratë (13 gjyqtarë dhe 1 prokuror) të hetimit disiplinor, procedurat hetimore janë në proces”, deklaroi ai.

Metani tha se janë realizuar 4 inspektime tematike, si inspektimi për hedhjen e shortit në gjykata, ndarjen e çëshjeve në prokurori, procedura për zbardhjen e tyre veçanërisht në Tiranë dhe procedura për zëvendësimin e prokurorëve. Në inspektimin e fundit, Inspektori i Lartë i Drejtësisë deklaroi se është vënë re tejkalim i procedurave që parashikon ligji./ CNA.al