web counter
LEXO PA REKLAMA!

SHKARKO APP

App Store
Google Play

Begaj, takim me presidentin e Estonisë/ Zbulohen temat e diskutimit

7 Qershor 2023, 17:25, Aktualitet CNA

Begaj, takim me presidentin e Estonisë/ Zbulohen temat e diskutimit

Presidenti i Republikës, Bajram Begaj, zhvilloi sot një takim me homologun estonez, Alar Karis.

Në një deklaratë të përbashkët për shtyp, Begaj bëri të ditur se një nga temat e diskutimit ishte integrimi i Shqipërisë.

“E falënderova Presidentin e Estonisë, që na kanë qendruar pranë dhe vazhdojnë të na gjenden pranë në procesin e integrimit në BE.

Integrimi në familjen e madhe evropiane është objektivi ynë madhor strategjik. Shqipëria mbajti vitin e kaluar Konferencën e Parë Ndërqeveritare me Bashkimin Evropian, falë mbështetjes edhe të Estonisë.

Jam besimplotë se këtë vit do të mbahet Konferenca e Dytë Ndërqeveritare, sërish edhe përmes përkrahjes tuaj. Integrimi jo vetëm i Shqipërisë, por i të gjithë rajonit të Ballkanit Perëndimor në BE, do të ishte një garanci e jashtëzakonshme për një të ardhme të stabilizuar dhe të prosperuar të të gjithë rajonit.

Në këtë kuadër, vlerësova se Estonia ka luajtur dhe vazhdon të luaj rolin e saj mbështetës për një Ballkan Perëndimor më të stabilizuar dhe të zhvilluar. Kjo është shumë e rëndësishme, veçanërisht në kontekstin e ri gjeopolitik dhe në situatën e sigurisë globale ku ndodhemi sot”, u shpreh ai.

Kreu i Shtetit deklaroi se temat e tjra të diskutimit lidhen me agresionin e Rusisë në Ukrainë dhe për anëtarësimet në NATO.

“U ndalëm në mënyrë të veçantë tek agresioni brutal dhe i pajustifikuar rus kundër Ukrainës, që solli në Evropë erërat e trazuara të një të djeshme që mendonim se e kishim lënë pas.

Shqipëria, që në krye të herës, e ka dënuar ashpër këtë agresion.  

Nënvizova faktin se vizioni i NATO-s i treguar deri më tani në përballimin e kësaj situate dhe zgjerimi së fundmi i Aleancës me Finlandën, tregoi se jemi më të fortë se kurrë, më të bashkuar dhe më të vendosur se kurrë për të mbrojtur vlerat e saj.

Jam i bindur se kjo do të tregohet qartazi dhe me aderimin sa më të shpejtë të Suedisë si edhe në Samitin e NATO-s që do të mbahet shumë shpejt fare pranë Estonisë, në Vilnius, Lituani.

Doja gjithashtu të vija theksin tek pjesëmarrja e trupave tona në misionet e NATO-s në përgjithësi dhe në batalionin shumëkombësh të NATO-s në Letoni në veçanti, që reflektojnë më së miri rolin aktiv të Shqipërisë si shtet anëtar i NATO-s.

Mënyra se si do t’i përgjigjemi bashkarisht sfidave të sigurisë të tanishme, do të përcaktojë se si do të jetë e ardhmja për kontinentin tonë por edhe për botën në dekadat që do të vijnë. Ndaj më vjen mirë që me Presidentin e Estonisë ndamë të njëjtën qasje në mënyrën se si duhet të përballojmë këto sfida. Sfidat komplekse të sigurisë mund t’i përballojmë vetëm së bashku”, theksoi Begaj./ CNA.al





Lajmet e fundit nga