web counter
LEXO PA REKLAMA!

SHKARKO APP

App Store
Google Play

“PD-PS dominojnë skenën politike pa meritë”/ Kikia: Vendi duhet t'i nënshtrohet reformave të thella

7 Janar 2026, 22:17, Aktualitet CNA

“PD-PS dominojnë skenën politike pa meritë”/ Kikia:

Gazetari dhe analisti Mentor Kikia ka folur mbrëmjen e sotme lidhur me zhvillimet politike në vend. Kikia tha se dy partitë më të mëdha në Shqipëri po dominojnë me ligj skenën politike dhe jo me meritë.

I ftuar në A2 CNN, ai tha se vendi duhet t'i nënshtrohet reformave të thella, ndërsa shtoi se duhet siguruar një Reformë Zgjedhore afatgjatë dhe jo “arnime elektorale tre javë para zgjedhjeve”.

“Aktualisht ne nuk jemi në kushtet thjesht të nevojës për të larguar një qeveri e cila na rezulton që është e korruptuar dhe ta zëvendësojmë me një qeveri tjetër. Status kuoja politike dhe status kuoja në partitë politike, e theksoj këtë, bën të nevojshëm jo thjesht një reformë, por një shkundje të sistemit edhe më i fuqishëm se ai i vitit 1992, se atëherë ishte një shkundje pa ditur se çfarë na pret, sepse s'kishim eksperiencë.

Sot Shqipëria është në kushtet kur ka konsumuar 35 vjet, një gjeneratë e gjysmë në ngritjen e pushtetit të individit dhe të kultit të individit, Sali Berishës dhe të Edi Ramës, dhe nuk ka ngritur dot sistemin funksional dhe shtetin funksional. Ftesa e Partisë Demokratike për një tryezë më ka ardhur edhe mua personalisht dhe pyetja që bëj është: çfarë do diskutohet? Çfarë duhet sot për t’u bërë për Shqipërinë?

Faktori opozitar mund të bashkohet përtej ndasive ideologjike dhe politike, të majtë, të djathtë, të qendrës. Nëse ka një objektiv madhor, këto energji bashkohen në arritjen e këtij objektivi dhe më pas secila palë shikon qasjet e veta. Përsëri vazhdoj të pyes: cili është objektivi?

Objektivi për mua nuk është thjesht largimi i një kryeministri. Janë ndërruar kryeministrat dhe aq më pak për ta ndërruar këtë kryeministër me një ish-kryeministër, por vendi duhet t'i nënshtrohet reformave absolutisht të thella. Duhet siguruar një Reformë Zgjedhore afatgjatë dhe jo arnime elektorale tre javë para zgjedhjeve. Për t'i dhënë fund dominimit me ligj, jo me meritë, me ligj, të skenës politike nga dyshja PS-PD”, tha Kikia. /CNA





Lajmet e fundit nga