E fundit!

10:46 Aktualitet

Skenarët e Erion Veliajt në protestën për Zvërnecin

Një protestë që parullën ka “Zvërnec”, por po t’i heqësh e...

Nga më i pasuri, tek prokurori rebel dhe ai që “preku” ish ministrin e Ramës/ Kandidatët që synojnë drejtimin e SPAK-ut

10 Shtator 2022, 12:27, Aktualitet CNA

Nga më i pasuri, tek prokurori rebel dhe ai që “preku” ish

Me 16 shtator KLP do të hapë garën për drejtues të SPAK-ut, pasi Arben Krajës me 18 dhjetor 2022 i mbaron mandati.

Katër janë kandidatët që lakohen për të marrë këtë detyrë dhe sipas kreut të KLP-së, Alfred Balla nuk mjafton vetëm kriteri i të qenit prokuror i mirë, por duhet edhe të jetë edhe menaxhues të mirë.

Altin Dumani që është aktualisht, zëvendësi i Arben Krajës, Klodian Braho, Edvin Kondili dhe Adnan Xholi i cili është emëruar në SPAK në Korrik të vitit 2021, janë kandidatët që lakohen.

CNA.al po sjell më poshtë një profil të tyre në aspekin pasuror por edhe profesional.

Klodian Braho

Prokurori Braho në nisje të karrierës së tij në Berat, rezulton i varfër dhe më vonë, në vitin 2010 ka nisur ta marrë veten ekonomikisht.

Thënë ndryshe ka shtuar të ardhurat dhe është bërë me apartament në Tiranë. Pasi mund të thuhet se është rehatuar si prokuror por edhe si profesor në universitet private.

Bashkëshorja e tij, punon në Hipotekën e Tiranës, dhe rezulton me një pasuri modeste.

Klodian Braho është prokurori që firmosi arrestimin e ish-ministrit të Mjedisit Lefter Koka në vitet 2013-2017 për aferën korruptive të inceneratorëve.

Klodian Braho ka hetuar edhe ish-kryeprokurorin Adriatik Llalla dhe ka çuar për gjykim çështjen në ngarkim të ish-kryetarit të Bashkisë së Vlorës, Shpëtim Gjika.

Klodian Braho ka mbaruar Shkollën e Magjistraturës. Në vitin 2016, Klodian Braho është dekretuar si prokuror në Prokurorinë pranë Gjykatës së Shkallës së Parë për Krimet e Rënda.

Paralelisht me punën si prokuror, Braho është angazhuar edhe në mësimdhënie apo si ekspert në Shkollën e Magjistraturës.

Altin Dumani

Nga më i pasuri, tek prokurori rebel dhe ai që “preku” ish

Emri i Altin Dumanit është lakuar në kohën kur punonte në Prokurorinë e Apelit, pasi ka rënë pre e përgjimeve.

Në media u raportua se ai ishte mbajtur për disa ditë në survejim të plotë nëpëmjet një mekanizmi elektronik GPS dhe një laptopi.

Personi që kishte ngritur dhe kishte projektuar e financuar këtë skemë survejimi ishte një 26 vjeçar, kushëriri i ish-prokurorit të Tiranës Aleksandër Plepi, cili ishte arrestuar nga kolegu i tij Altin Dumani.

Pasuria e Dumanit ngjason me atë të një agjencie imobiliare e cila sapo ka nisur biznesin.

Ajo që vërehet pa kaluar në një përllogaritje, është se ka një ndryshim rrënjësor nga pasuria fillestare e vitit 2004 deri tek pasuria që ka deklaruar për vitin 2016.

Dumani është një nga prokurorët që drejtoi i pari njësinë Task Forcë, ngritur vite më parë për të luftuar krimin e jakave të bardha. Ka një karrierë prej 20 vitesh si prokuror, në mars të vitit 1999, ka shkelur për herë të parë në prokurori, me detyrë në Sarandë.

Ai u bë drejtues prokurorie për herë të parë në Tropojë, në vitin 2000, një post sipas Dumanit që u refuzua nga shumë të tjerë për shkak të çështjeve problematike atje. Ai bëri bujë me qëndrimin e akullt që mbajti gjatë gjykimit të 29 të pandehurve të Gërdecit dhe 3 dënimet e përjetshme që kërkoi për tre nga të pandehurit kryesorë të tragjedisë së 15 marsit 2008.

Edvin Kondili

Nga më i pasuri, tek prokurori rebel dhe ai që “preku” ish

Prokurori Edvin Kondili ishte një nga prokurorët rebelë që refuzuan shortin për dosjen Shullazi dhe kërkesën e ish kryeprokurores së komanduar të Krimeve të Rënda, Donika Prela.

Kondili është prokurori që ka bërë veprimet e para për sekuestrimin e 613 kg kokainë në Portin e Durrësit.

Kondili ka pasur një sërë çështjesh të trafikimit të kanabisit, por edhe dosje të tilla si “Lazarati”, por edhe dosjen e Alket Hatijas. Edvin Kondili ka hetuar edhe grupin e Admir Tafilit. Po ashtu, Edvin Kondili ka pasur në duart edhe dosjen e rrëmbimit dhe zhdukjes së Remzi Hoxhës.

Sa i përket pasurisë, Kondili, burimet e të ardhurave i ka nga paga e tij dhe e bashkëshortes.

Pasuri të patundshme ai ka deklaruar vetëm një apartament të blerë në vitin 2011, i cili ka kushttuar 70 mijë euro. Si burim ai deklaron 60 mijë euro kredi. Në vitin 2014 bashkëshortja e tij ka marrë 10 mijë euro hua nga i vëllai. Në 2015, ka blerë një automjet, benz, 500 000 lekë.

Adnan Xholi

Nga më i pasuri, tek prokurori rebel dhe ai që “preku” ish

Prokurori Adnan Xholi ishte i zgjedhuri i kryeprokurores së përkohshme Arta Marku si pjesë e ekipit të saj.

Në janar të vitit 2018 me ndryshimet e kryera në organin e akuzës nga kryeprokurorja e përkohshme, Arta Marku, prokurori Xholi u emërua në krye të Drejtorisë Gjyqësore.

Prokurori Xholi, njihet edhe si prokurori që urdhëroi arrestimin e dy deputetëve, Tom Doshi dhe Mark Frroku.

Kjo i përket aspektit profesional, ndërsa sa i përket aspektit pasuror, edhe prokurori Adnan Xholi rezulton pas shtëpi dhe me kredi.

Sipas Birn, Adnan Xholi ka deklaruar një pasuri familjare me vlerë 300 mijë lekë në vitin 2003, viti i parë i deklarimit të pasurisë për zyrtarët publikë. Referuar deklaratës së parë, Xholi nuk dispononte prona të patundëshme ndërsa pasuria e tij përbëhej nga një autoveturë me vlerë 300 mijë lekë e siguruar me të ardhurat nga paga.

Në fund të vitit 2017, pasuria familjare e Prokurorit Xholi ishte 11.9 milionë lekë, me një rritje 40 herë nga deklarimi i parë. Kjo pasuri përbëhet nga një apartament i blerë me kredi në vitin 2005, likujditete në bankë në masën 3.8 milionë lekë dhe likujditete kesh në masën 16 milionë lekë. Xholi disponon edhe automjete me vlerë 1.1 milionë lekë.

Për periudhën deklaruese 2007-2017, Xholi dhe familjarët e tij kanë eklaruar të ardhura totale në masën 27 milionë lekë, nga të cilat, afro 20 milionë lekë janë të ardhurat nga paga të prokurorit dhe 5.7 milionë lekë nga paga e bashkëshortes./CNA.al