web counter
LEXO PA REKLAMA!

SHKARKO APP

App Store
Google Play

E fundit!

x

Nga kapja e të shumëkërkuarit për “masakrën e Çoles” tek operacionet antidrogë/ Policia e Shtetit bën bilancin e një jave

10 Korrik 2022, 10:59, Aktualitet CNA
Nga kapja e të shumëkërkuarit për “masakrën e
Foto ilustruese

Policia e Shtetit ka bërë bilancin e një jave. Sipas të dhënave, në shtatë ditë janë zhvilluar dhjetëra operacione antidrogë dhe për personat në kërkim.

Gjatë kësaj jave, është arrestuar Ani Begaj, i shumëkërkuari për “masakrën e Çoles”, i dënuar me 35 vite burg për për vrasje të dyfishtë.

"Përkushtim dhe punë profesionale nga të gjitha strukturat e Policisë, në të gjithë vendin. Dhjetëra operacione të zhvilluara, bashkëpunime me partnerët ndërkombëtarë, kontrolle dhe monitorime në çdo skaj të territorit, me qëllimin e vetëm, luftën pa kompromis ndaj çdo fenomeni kriminal, në çfarëdo forme të shfaqjes së tij.

Vijon puna, nga të gjitha strukturat e Policisë, në çdo skaj të vendit, me qëllim garantimin e një sezoni turistik të sigurtë dhe të qetë. Gjatë kësaj jave ka nisur patrullimi intensiv nga shërbimet e Policisë, në plazhe, si dhe është finalizuar operacioni policor 'Bregdeti i lirë', si rezultat i të cilit u liruan hapësira publike në zonën e Porto Romanos, të zëna në mënyrë të kundërligjshme, me 400 komplete me çadra dhe shezlongë. Po në këtë kuadër, Policia Kufitare e Shëngjinit u erdhi në ndihmë 7 pushuesve që kishin mbetur në det të hapur, me një pedalon.

Si rezultat i bashkëpunimit të FAST Albania me strukturat homologe, në kuadër të operacioneve 'Double' dhe 'Member', u vunë në pranga 3 shtetas në kërkim ndërkombëtar, për vepra penale në fushën e narkotikëve.

Në kuadër të operacionit 'Chasing', pas disa minutash ndjekjeje nga Policia e Vlorës, u kap dhe u vu në pranga Ani Begaj, i dënuar me 35 vjet burgim për vrasje të dyfishtë, si dhe u arrestua 26-vjeçari që e shoqëronte dhe e ruante me armë.

Gjatë kësaj jave janë arrestuar, proceduar dhe shpallur në kërkim 491 shtetas, nga këta: 122 janë arrestuar, 346 janë proceduar penalisht dhe 23 janë shpallur në kërkim. 

Janë kapur në total 45 persona në kërkim, nga të cilët: 40 në kërkim kombëtar dhe 5 në kërkim ndërkombëtar. 

Janë zhvilluar 28 operacione policore, të koduara: 'Double', 'Member', 'Room', 'Flagranca', 'Stacioni i fundit', 'Kantieri', 'Circle', 'Tufina', 'Phones', 'Snare', 'Shëtitësit', 'Kroi i Madh', 'Bregdeti i lirë', 'Action', 'Over', 'Silence', 'Chasing', 'Vilza', 'Kudhësi', 'Road Guard 30', 'Loading', 'Linja', 'Gimaj', 'Corner', 'Grizë', 'Informaliteti', 'Basti i fundit' dhe 'Perimetri 180'.

Operacioni 'Grizë' / Fier - Zbulohen dhe shkatërrohen 2 ambiente me lëndë narkotike; sekuestrohen 208 gramë heroinë, 17.5 kg kanabis në proces tharjeje, 1448 fara kanabis, 3 granata difensive dhe ofensive, 2 armë gjahu pa leje dhe 391 fishekë luftarak; vihen 2 shtetas në pranga, shpallen në kërkim 2 të tjerë;

Operacioni 'Gimaj' / Shkodër - Kultivonin kanabis në ambient të hapur, vihen në pranga 2 shtetas; Sekuestrohen dhe asgjësohen bimët narkotike, sekuestohen edhe një armë zjarri automatik dhe municion luftarak;

Operacioni 'Kroi i Madh'/ Krujë-Sekuestrohen rreth 3.7 kg kanabis në formë boçeje dhe bimë kanabisi të kultivuara; vihen në pranga 2 shtetas;

Operacioni 'Linja' / Lezhë – Drogë e përpunuar si çokollatë, nga Tirana në drejtim të Tropojës, me autobus; bllokohet autobusi; sekuestrohen 15 pako me kanabis në formë çokollate; vihet në pranga drejtuesi i autobusit;

Operacioni 'Tufina' / Tiranë - Shpërdoruan detyrën dhe ushtruan ndikim të paligjshëm, për një sërë shërbimesh publike, vihen në pranga 8 shtetas, shpallen në kërkim 2 shtetas dhe procedohen penalisht 2 të tjerë, bashkëpunëtorë të njëri-tjetrit;

Operacioni 'Flagranca' / Tiranë - Sekuestrohen 3 armë zjarri, krehra, municion luftarak dhe një palë dylbi; vihen në pranga 2 shtetas, procedohet penalisht një tjetër.

Si rezultat i kontrolleve masive, operacioneve dhe goditjeve nga DVP-të në qarqe, janë sekuestruar lëndë narkotike kanabis dhe heroinë, fara, fidanë dhe bimë kanabis, 2 peshore elektronike, shuma të konsiderueshme parash, të përfituara nga veprimtaria kriminale, dylbi, 7 automjete dhe 30 aparate celulare.          

Në fushën e armëmbajtjes pa leje, janë evidentuar dhe goditur 11 raste dhe janë sekuestruar 9 armë zjarri, 5 armë gjahu, 3 granata, 4 thika, dorezë, shkop bejsbolli, shufër metalike dhe municion luftarak.

Janë goditur 3 raste të kundërshtimit të punonjësve të Policisë, si dhe janë ndjekur ligjërisht 49 raste të dhunës në familje.   

Janë evidentuar dhe goditur 20 raste të krimeve mjedisore, 4 raste të organizimit të lojërave të fatit dhe 3 raste të vjedhjes së energjisë elektrike.

Në fushën e narkotikëve janë evidentuar dhe goditur 26 raste, ndërsa në fushën e krimit ekonomik janë evidentuar dhe goditur 20 raste.

Janë evidentuar dhe goditur 4 raste të veprimtarisë kriminale me objekt zjarrvënien e qëllimshme dhe janë proceduar penalisht 4 shtetas", thuhet në njoftim. / CNA.al





Lajmet e fundit nga