web counter
LEXO PA REKLAMA!

SHKARKO APP

App Store
Google Play

Në prag të përfundimit të mandatit/ Yuri Kim, mesazh për marrëdhëniet me Shqipërinë

15 Dhjetor 2022, 18:51, Aktualitet CNA
Në prag të përfundimit të mandatit/ Yuri Kim, mesazh
Ambasadorja amerikane në Tiranë, Yuri Kim

Ambasada amerikane në Tiranë ka dhënë një mesazh në lidhje me marrëdhëniet diplomatike SHBA-Shqipëri, pas dokumentarit të transmetuar mbrëmë.

Në dokumentar, ambasadorja Yuri Kim është shprehur se marrëdhëniet diplomatike kapërcejnë çdo qeveri, udhëheqës apo person.

Kim ka theksuar se lidhja SHBA-Shqipëri është aq e fortë sa nuk mund të thyhet.

“100 Vjet Bashkë: Në nder të 100-vjetorit të marrëdhënieve diplomatike mes Shqipërisë dhe Shteteve të Bashkuara, ambasada e SHBA në Tiranë organizoi mbrëmjen e djeshme shfaqjen e premierës së një dokumentari të veçantë që përkujton historinë e marrëdhënies. Midis të ftuarve ishin zyrtarë aktualë dhe ish-zyrtarë, politikanë, akademikë, sipërmarrës, përfaqësues fetarë, ushtarakë, media, shoqëri civile dhe të rinj.

“Shpresoj të bindeni edhe më shumë se lidhja mes vendeve tona është e veçantë, e fortë dhe do të zgjasë. Është një lidhje që kapërcen çdo qeveri, udhëheqës apo person. Është një lidhje mes dy popujve me besimin e përbashkët në liri, demokraci, prosperitet dhe drejtësi. Është një lidhje që nuk mund të thyhet”, thotë në dokumentar ambasadorja Yuri Kim.

Dokumentari i 100-vjetorit është një prodhim i përbashkët i TV Klan dhe ambasadës së SHBA. Dokumentari i plotë do të transmetohet së shpejti në TV Klan, ndaj na ndiqni në vijim për më shumë detaje”, thekson ambasada.

Kujtojmë se disa ditë më parë, ministria e Jashtme deklaroi se kanë nisur procedurat për zëvendësimin e ambasadores Yuri Kim.

Këtë gjë e konfirmoi edhe kryeministri Edi Rama gjatë një prononcimi me gazetarët, teksa tha se nuk ka krisje me diplomaten e SHBA.

Ndërkohë, vetë Yuri Kim është shprehur se nuk do të largohet nga Shqipëria, por do të qëndrojë edhe për disa kohë më gjatë./ B.A. – CNA.al





Lajmet e fundit nga