Ndarja nga jeta e Rustem Gjatës/ Berisha: Dha kontribut të madh në udhëheqjen e institucioneve të reja të drejtësisë

29 Prill 2026, 12:55, Aktualitet CNA

Ndarja nga jeta e Rustem Gjatës/ Berisha: Dha kontribut të madh

Kryetari i PD-së, Sali Berisha, ka reaguar për ndarjen nga jeta të ish-deputetit dhe ish-kreut të Gjykatës Kushtetuese, Rustem Gjata.

Në reagimin e tij, Berisha shprehet se ish-deputeti i PD-së ishte një prej civilistëve dhe konstitucionalistëve më të shquar të Shqipërisë, ndërsa shton se dha një kontribut të madh në zëvendësimin e legjislacionit të diktaturës komuniste me ligjet e reja, si dhe në udhëheqjen e institucioneve të reja të drejtësisë.

Kryedemokrati thekson se monografitë e tij mbi të drejtën civile, pronësinë, detyrimet dhe kontratat, përgjegjësinë civile, dëmin kontraktor e jashtëkontraktor, janë një udhërrëfyes për përgatitjen e qindra dhe mijëra juristëve të rinj. Berisha i shprehu gjithashtu ngushëllimet familjes së tij.

Reagimi i plotë:

Rrustem Gjata mbylli sytë përgjithmonë

Të dashur miq, dielli perëndoi përgjithmonë për Rrustem Gjatën, një prej civilistve dhe konstitucionalistëve më të shquar të Shqipërisë. Ish-deputet i Partisë Demokratike dhe pedagog i respektuar, Doktor i Shkencave në Fakultetin e Drejtësisë, Rrustem Gjata do të ishte ndër juristët e parë që do të mbështeste dhe do të bashkohej me opozitën shqiptare dhe Partinë Demokratike që në hapat e parë të themelimit të saj. Ai dha një kontribut të madh në zëvendësimin e legjislacionit të diktaturës komuniste me ligjet e reja, si dhe në udhëheqjen e institucioneve të reja të drejtësisë.

Rrustem Gjata u zgjodh nga Parlamenti si Kryetari i parë i Gjykatës Kushtetuese, të cilën e drejtoi me kompetencë dhe integritet të lartë që nga themelimi i saj deri në vitin 1997 – vit në të cilin ata që erdhën me dhunë në pushtet e larguan me një puç antikushtetues.

Përveç kontributit të tij në jurisprudencën e kësaj gjykate, që hodhi bazat e drejtësisë kushtetuese në Shqipëri, Rrustem Gjata është autor i një morie artikujsh, referencash e monografish në fushën e së drejtës, kryesisht të asaj private. Monografitë e tij mbi të drejtën civile, pronësinë, detyrimet dhe kontratat, përgjegjësinë civile, dëmin kontraktor e jashtëkontraktor, janë një kontribut i vyer dhe udhërrëfyes për përgatitjen e qindra dhe mijra juristëve të rinj.

Duke shprehur respektin dhe vlerësimin tim të madh për kontributin e shquar të Dr. Rrustem Gjatës, i shpreh ngushëllimet e mia më të ndjera familjes së tij të nderuar dhe lutem së bashku me ta që shpirti i tij i mirë të gjejë paqen e merituar.

Ngushëllime, Sali Berisha! /CNA