web counter
LEXO PA REKLAMA!

SHKARKO APP

App Store
Google Play

E fundit!

x

Leka Bungo drejt “fundosjes”/ Anëtarët e Këshillit: Ka shkelur ligjin, në konflikt të pastër interesi

11 Shkurt 2025, 16:06, Aktualitet CNA

Leka Bungo drejt “fundosjes”/ Anëtarët e Këshillit:

Sot në Komisionin e Medias është zhvilluar seanca dëgjimore me anëtarët e Këshillit Drejtues të RTSH-së dhe kryetarin Leka Bungo.

Ky i fundit është hedhur në sulm ndaj anëtarëve të Këshillit Drejtues dhe ndaj CNA duke përdorur një gjuhë aspak etike.

“Nuk e quaj media, janë shpifje, trillime, plehra dhe nuk jam përgjigjur. Më janë lutur për ta bërë dhe mezi kam pranuar", - tha Bungo.

Pas seancës dëgjimore ku dhe është njoftuar se kanë nisur procedurat për shkarkimin e anëtarëve dhe kryetarit të Këshillit Drejtues të RTSH-së, anëtarët e Këshillit Drejtues të RTSH-së Milena Selimi, Edmond Tullumani, Albert Minga dhe Ilir Keko i janë drejtuar Komisionit të Medias dhe Kuvendit me një letër ku shprehen se procedura për shkarkimin e anëtarëve të Këshillit Drejtues është bërë në ndikim të veprimeve të kundërligjshme të Leka Bungos.

Leka Bungo, i cili gjatë gjithë periudhës së drejtimit prej katër vitesh ka krijuar probleme të shumta e serioze në mbarëvajtjen e institucionit e RTSH-së, pasi janë ndeshur në arrogancën, brutalitetin dhe shkeljen flagrante të normave etike nga Bungo.

Anëtarët e Këshillit Drejtues konstatojnë se z. Bungo është ai që e ka shkelur ligjin në mënyrë të përsëritur dhe është në konflikt të hapur interesi me përfitimet e padrejta që ka marrë, duke firmosur e zeza mbi të bardhë për projekte në RTSH, çfarë është e ndaluar rreptësisht.

Letra e plotë

Lënda: Lidhur me procedurën e shkarkimit të anëtarëve të Këshillit Drejtues të RTSH-së

DREJTUAR: Komisionit për Edukimin dhe Mjetet e Informimit Publik

Kuvendi i Shqipërisë

Znj. Ina ZHUPA, kryetare e Komisionit

Për dijeni: Znj. Elisa SPIROPALI, kryetare e Kuvendit të Shqipërisë

 Tiranë, më 11.02.2025

E nderuar znj. Zhupa,

Duke ju përcjellë ndjenjat e konsideratës sonë të lartë, ne, një grup anëtarësh të Këshillit Drejtues të Radio Televizionit Shqiptar, të njoftuar për nisjen e procedures së shkarkimit nga Komisioni parlamentar për Edukimin dhe Mjetet e Informimit Publik, ju parashtrojmë sa më poshtë vijon:

Në vlerësimin tonë, procedura e shkarkimit të anëtarëve të Këshillit Drejtues, në mënyrë kolektive, me nxitim dhe në shkelje të procedurave ligjore, është ndikuar nga veprimet antiligjore të kryetarit të Këshillit Drejtues, përfshirë edhe procedurën e fundit të zgjedhjes së Drejtorit të Përgjithshëm të RTSH-së.

Kjo procedurë është nismuar nga kryetari i KD, është drejtuar nga ai në disa seanca mbledhjeje, vendimi është lexuar edhe publikisht nga z. Bungo, por vetëm pasi u konstatua mossuksesi i kandidatit të preferuar të kryetarit të Këshillit, gjithçka u anatemua dhe u quajt e paligjshme.

Ne anëtarët e Këshillit Drejtues, kemi ndjekur dhe përjetuar me shqetësim të thellë qëndrimin dhe sjelljen e kryetarit Leka Bungo, i cili gjatë gjithë periudhës së drejtimit prej katër vitesh ka krijuar probleme të shumta e serioze në mbarëvajtjen e institucionit tonë, ndonëse përpjekjet e anëtarëve të Këshillit Drejtues, gjatë gjithë periudhës, kanë qenë për durim e qetësi, duke përcjellë mesazhe bashkëpunimi e tolerance ndaj kryetarit të Këshillit, por kanë ndeshur në arrogancën, brutalitetin dhe shkeljen flagrante të normave etike nga zoti Bungo.

Këshilli Drejtues është penguar në mënyrë të qëllimshme në komunikimim institucional me Komisionin parlmentar dhe Drejtorinë e Përgjithshme, duke bërë që shumë vendime e analiza të rëndësishme që duheshin marrë brenda afateve ligjore, të tejkalohen, gjë që penalizon gjithë procesin normal të funksionimit të RTSH-së.

Në këtë kuadër, kemi konstatuar se, kërkesa dhe shkresa të shumta të ardhura në adresë të Këshillit Drejtues nga Komisioni i Medias dhe Drejtoria e Përgjithshme, janë mbajtur të fshehura në mënyrë të qëllimshme nga z.Bungo, duke sjellë një ngërç dhe pasoja për institucionin.

Ne anëtarët e Këshillit Drejtues konstatojmë se z. Bungo është ai që e ka shkelur ligjin në mënyrë të përsëritur dhe është në konflikt të hapur interesi me përfitimet e padrejta që ka marrë, duke firmosur e zeza mbi të bardhë për projekte në RTSH, çfarë është e ndaluar rreptësisht;

Ne, anëtarët e Këshillit Drejtues, kundërshtojmë plotësisht procedurën e shkarkimit të anëtarëve, duke e konsideruar si një vendim politik dhe në kundërshtim të hapur me ligjin.

Pas dëgjesës së javës së shkuar, ne u treguam të gatshëm dhe me angazhim qytetar, profesional e ligjor, sipas sugjerimit Tuaj, për të vijuar komunikimin me Komisionin Parlamentar, në funksion të gjetjes së zgjidhjes më të mirë për situatën e krijuar. Ky angazhim i yni nuk u mor parasysh.

Në dëgjesën e Komisionit, ne u shprehëm dhe jemi të gatshëm për çdo qartësim të papajtueshmërive të pretenduara, në bazë kuadrit ligjor në fuqi,

Mbështetur në ligjin 97/2013 “Për mediat audiovizive në Republikën e Shqipërisë” dhe Statutin e RTSH-së, ne do të ndjekim të gjithë hapat ligjorë për kundërshtimin e çdo vendimi të kundërligjshëm.

Mbetemi të bindur që kërkesa jonë do të vlerësohet dhe merret në konsideratë.

Duke Ju falënderuar,

Milena Selimi Albert Minga

Edmond Tullumani Ilir Keko/ CNA





Lajmet e fundit nga