Kush është Aranita Brahaj? Kandidatja për pozicionin "Avokat i Popullit"

3 Dhjetor 2025, 09:38, Aktualitet CNA

Aranita Brahaj

Gazetarja Aranita Brahaj është një nga kandidaturat që garon për pozicionin e Avokatit të Popullit.

Brahaj është mes emrave që Kuvendi do të votojë për t’u zgjedhur në këtë pozicion, ku kandidati fitues duhet të sigurojë të paktën 84 vota të deputetëve.

Por kush është kandidatja për Avokate të Popullit, Aranita Brahaj?

Aranita Brahaj me mbi 28 vite përvojë profesionale në sektorin civil, median audiovizive, administratën publike dhe auditimin ligjor e financiar. E lindur më 11 prill 1977, ajo ka një karrierë si aktiviste dhe profesioniste e angazhuar në forcimin e institucioneve, mbikëqyrjen e financave publike dhe promovimin e modeleve të qeverisjes së hapur.

Aktualisht, Aranita Brahaj ushtron detyrat si Drejtuese Projekti dhe Eksperte pranë AIS / Open Data Albania, si dhe si Asistente Lektore me kohë të pjesshme në Departamentin e Gazetarisë, Fakulteti i Historisë dhe Filologjisë, Universiteti i Tiranës (Vitet akademike 2021–2024).

Ajo është diplomuar në Fakultetin e Drejtësisë të Universitetit të Tiranës me një Diplomë të Integruar të Nivelit të Dytë (2009) dhe mban titullin Master i Shkencave në të Drejtën Publike nga Universiteti Europian i Tiranës (2011). Studimet e saj të para universitare i ka përfunduar në Gjuhë Shqipe dhe Letërsi në Universitetin e Tiranës (2000).

Gjatë karrierës së saj, Brahaj është shquar si nxitëse dhe promotore e Open Data dhe Open Government, duke krijuar platforma të rëndësishme për dokumentimin transparent të shpenzimeve publike, kontraktimeve dhe strukturave të pronësisë, si:

Open Spending Albania

Open Procurement Albania

Open Corporates Albania

Ajo është autore e metodologjive të specializuara për vlerësimin e rreziqeve në prokurimin publik dhe zbatimin e standardeve të kontraktimit të hapur në Shqipëri. Si analiste e financave publike, ka kontribuar në forcimin e mekanizmave të mbikëqyrjes dhe kontrollit publik.

Në rolin e Drejtueses së projekteve të AIS, Aranita Brahaj ka udhëhequr programe të rëndësishme të shoqërisë civile, të fokusuara në: parandalimin dhe gjurmimin e korrupsionit përmes të dhënave të hapura; verifikimin e integritetit dhe deklarimeve të pasurive të zyrtarëve të nivelit të lartë; fuqizimin e të rinjve në iniciativat kundër korrupsionit; përdorimin e teknologjisë dhe aktivizmin qytetar për zgjedhje të drejta; auditimin financiar të subjekteve zgjedhore; monitorimin e integritetit institucional përmes Regjistrit të Magjistratëve (magjistrat.al).

Kontributi i saj ka qenë thelbësor në rritjen e transparencës publike dhe në vendosjen e standardeve të reja të dokumentimit të hapur në Shqipëri./CNA