Rama i kundërpërgjigjet Shoqatës së Gjyqtarëve: Gaboni nëse prisni që unë të mbyll gojën

9 Dhjetor 2025, 10:45, Aktualitet CNA

Rama i kundërpërgjigjet Shoqatës së Gjyqtarëve: Gaboni

Kryeministri Edi Rama i është kundërpërgjigjur deklaratës së Shoqatës së Gjyqtarëve.

Sipas Ramës, shoqata ose nuk e di kuptimin e fjalës presion, ose e di që kur ankohen për të nuk u hyn gjemb në këmbë, pasi prej 10 vitesh lufton për ta.

Kryeministri thotë se shoqata gabon nëse pret që të mbyllë gojën dhe të mos ndajë opinionin e tij edhe kur është palë në një gjyq kushtetues.

Po ashtu Rama është shprehur se Shoqata e gjyqtarëve ka bërë kërkesë të përsëritur ndaj Gjykatës Kushtetuese për rirritjen e pagave të gjyqtarëve me vendim gjykate duke rrëmbyer kompetencat e qeverisë dhe parlamentit.

“Shoqata e Gjyqtarëve ka bërë deklaratë për t’u ankuar për 'presionin' tim ndaj Kushtetueses. Dy mundësi ka këtu:

Ose nuk e dinë kuptimin e fjalës presion, sepse nuk i kam parë të ankohen për ca të tjerë, që prej vitesh u këndojnë librin e shtëpisë njerëzve të drejtësisë, ose e dinë që kur ankohen për mua, nuk u hyn gjemb në këmbë, sepse unë jam ai që kam 10 vjet që nuk luftoj me ta, po luftoj për ta, madje duke i përtypur në heshtje, si çështje të pavarësisë së shpallur botërisht me Reformën në Drejtësi, edhe jo pak 'lajthitje' të dhimbshme të Gjyqësorit, në dëm të lirive e të drejtave të njerëzve të këtij vendi dhe të interesave të këtij shteti.

Mirëpo gabon shumë Shoqata e Gjyqtarëve, nëse pret që unë të mbyll gojën e të mos ndaj me publikun opinionin tim, as edhe kur jam vetë palë në një gjyq kushtetues, për shkak se funksioni që mbuloj, me votat e afro 1 milion shqiptarëve, është goditur në pavarësinë e vet nga një prokuror e një gjykatës dhe rrezikon të gjymtohet për sot e për të ardhmen në shtyllën e vet kurrizore.

Jo vetëm kaq, po Shoqata e Gjyqtarëve duhet ta dijë që do të gabonte po kaq shumë sikur të priste heshtjen time për kërkesën e saj skandaloze dhe të përsëritur ndaj Gjykatës Kushtetuese, për (ri)rritjen e pagave të gjyqtarëve me vendim gjykate, duke rrëmbyer kompetencat e qeverisë e të parlamentit.

Heshtja ime herën e parë, përpara sesa të merrej ai vendim befasisht i turpshëm, nuk do të përsëritet këtë herë, kur me (ri)kërkesën në fjalë, shoqata e gjyqtarëve po tenton të marrë nga buxheti i shtetit, duke anashkaluar qeverinë dhe parlamentin, një rritje të re prej plot 1600 eurosh - po, po, 1600 euro plus pagës aktuale - të pagave të magjistratëve e të këshilltarëve të tyre.

Në ndërkohë, unë dhe qeveria e shumica parlamentare që kam nderin të udhëheq, mirëpresim krahëhapur çdo komunikim institucional me shoqatën në fjalë, për të adresuar nevojat e sfidat e drejtësisë së re, ku parimi i shenjtë i pavarësisë së Gjyqësorit, duhet mbrojtur me çdo kusht jo vetëm nga ndërhyrjet e jashtme të kujtdoqoftë, përfshirë dhe mua vetë, po edhe nga krimbi i brendshëm i papërgjegjshmërisë së gjyqtarëve, i cili bren përditë besimin e popullit te drejtësia”, deklaron Rama./ CNA