Ndotje alarmante në Çërravë/ Çarja e digës së rezervuarit përmbyt tokat me mbetje dhe inerte

8 Dhjetor 2025, 16:54, Aktualitet CNA

Ndotje alarmante në Çërravë/ Çarja e digës

Në fshatin Çërravë të Pogradecit, dhjetëra hektarë tokë bujqësore janë dëmtuar rëndë pas çarjes së digës së rezervuarit, vetëm pak muaj pasi ishte rikonstruktuar nga Bashkia Pogradec. Uji ka marrë përpara mbetje të groposura ndër vite dhe i ka shpërndarë në parcela, duke mbuluar me plehra, gurë dhe çakull të gjitha kulturat e mbjella.

Banorët thonë se prej ditësh po përballen me një situatë të paprecedentë. Tokat ku kultivojnë grurë, elb dhe jonxhë, burim kryesor për ushqimin e bagëtive dhe të ardhurat e familjeve, tashmë janë të pambledhshme pa ndërhyrjen e institucioneve.

“Shirat e përmbytjeve, ishte një rezervuar atje lart, e bënë si e djallosën ata, e këputi ai edhe na bëri keq këtej. Këtu është 5-6 hektarë e përmbytur, me gurë e çakull. Unë kam 4 dynym, djali i xhaxhait 5-6 dynym, të gjitha të mbjella me elb e jonxhë. Ajo vetë nuk pastrohet. Ju lutemi të vijnë nga bashkia me eskavator, të na heqin inertet. S’kam ça i bëj më tokës tani, nuk mbillet ajo. Dëmi është 300-400 mijë lek të vjetra. Në komunë na thanë ‘do vijmë, do ta pastrojmë’, por s’po shihet njeri.

Këtu rezervuari është bërë para 5-6 muajsh, investim i Bashkisë Pogradec. Gjatë shirave u shkëput, gërryeu gjithë vendin e restauruar dhe mori tatëpjetën, plehra e mbetje, i solli në arra. Po ra shi tjetër, do bëhet më keq. Këto janë për bagëtinë, jonxhë që ne e korrim nesër. Gruri, një dynym, është mbushur me gurë e çakull. Ka 4 familje që merren me bujqësi këtu, dhe toka të tjera të pambjella. Na shpëtoi Zoti që kishte rrjeta, se ndryshe çakulli do të vinte deri në shtëpi.

Rezervuarin e përdorim për të vaditur tokat. Kjo është bërë që në kohën e komunizmit, pastaj fshatarët e hapën vetë dhe u bë kanal i madh. Bashkia erdhi, e mbushi, por jo si duhet. Aty ka qenë vendi ku hidhnim mbeturina më parë dhe kur pati përmbytje i mori të gjitha para. Dëmtohen tokat, çfarë t’u bësh! Plot gurë. Atë që e bëri rezervuarin duhet ta çosh në Spaç”, janë shprehur banorët.

Banorët i kërkojnë Bashkisë Pogradec ndërhyrje të menjëhershme për pastrimin e tokave me mjete të rënda dhe rregullimin e kanalit të ujitjes, i cili sipas tyre u shemb vetëm pak muaj pasi u ndërtua. Ndërkohë, ata thonë se çdo ditë vonesë u sjell humbje të tjera, pasi kulturat bujqësore nuk mund të shpëtohen dhe rrezikohet ushqimi i bagëtive. Situata në Çërravë mbetet e rëndë dhe banorët presin një zgjidhje urgjente për të shmangur një katastrofë edhe më të madhe nëse shirat rikthehen sërish. /CNA