KPA pushon çështjen e vetingut të gjyqtarit të Tiranës

22 Janar 2026, 20:28, Aktualitet CNA

KPA pushon çështjen e vetingut të gjyqtarit të

Kolegji i Posaçëm i Apelimit vendosi sot pushimin e gjykimit të çështjes së vetingut të gjyqtarit të Tiranës, Gentian Hamiti, duke lënë në fuqi konfirmimin e tij në detyrë.

Vendim u mor pasi drejtuesi i SPAK, Klodjan Braho, tërhoqi ankimin e tij gjatë konkluzioneve përfundimtare të enjten, duke e konsideruar bindës shpjegimin e gjyqtarit në lidhje me gjetjet në të tre kriteret e rivlerësimit: pasurinë, pastërtinë e figurës dhe profesionalizmin.

Njoftimi:

Kolegji i Posaçëm i Apelimit zhvilloi më datë 22.01.2026, ora 13:00, seancën gjyqësore publike të çështjes (JR) nr. 21/2024, datë 06.06.2024, që i përket ankimit të Komisionerit Publik kundër vendimit të Komisionit të Pavarur të Kualifikimit nr. 743, datë 19.03.2024, që lidhet me subjektin e rivlerësimit Gentian Hamiti.

Drejtuesi i Prokurorisë së Posaçme z. Klodjan Braho, deklaroi se subjekti i rivlerësimit me provat dhe argumentet e reja të paraqitura gjatë procesit gjyqësor në Kolegj, arriti të provojë të kundërtën e shkaqeve të ankimit për të tria kriteret e rivlerësimit. Përfundimisht, Drejtuesi i Prokurorisë së Posaçme i kërkoi Kolegjit lënien në fuqi të vendimit të Komisionit të Pavarur të Kualifikimit nr. 743, datë 19.03.2024.
Subjekti i rivlerësimit Gentian Hamiti ndau të njëjtin qëndrim me Drejtuesin e Prokurorisë së Posaçme z. Klodjan Braho dhe i kërkoi Kolegjit lënien në fuqi të vendimit të Komisionit të Pavarur të Kualifikimit.

Pasi dëgjoi kërkimet përfundimtare të palëve, trupi gjykues vendosi mbylljen e shqyrtimit gjyqësor dhe u tërhoq për marrjen dhe shpalljen e vendimit përfundimtar si më poshtë vijon:

Trupi gjykues i Kolegjit të Posaçëm të Apelimit, i përbërë nga Ina Rama kryesuese, Albana Shtylla relatore, Mimoza Tasi, Rezarta Schuetz, Sokol Çomo anëtarë, shpalli vendimin për çështjen nr. 21/2024, datë 06.06.2024, që i përket ankimit të Komisionerit Publik kundër vendimit të Komisionit të Pavarur të Kualifikimit, nr. 743, datë 19.03.2024, që lidhet me subjektin e rivlerësimit Gentian Hamiti.

Në përfundim të gjykimit, trupi gjykues, bazuar në nenin 4, pika 6 të ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, dhe në nenet 451, shkronja “b” e 463 të Kodit të Procedurës Civile, në mënyrë unanime, vendosi:

Pushimin e shqyrtimit të çështjes (JR) nr. 21/2024, që i përket ankimit të Komisionerit Publik kundër vendimit nr. 743, datë 19.03.2024 të Komisionit të Pavarur të Kualifikimit, për subjektin e rivlerësimit Gentian Hamiti.

Ky vendim është përfundimtar dhe ka efekt të menjëhershëm.

U shpall sot, më datë 22.01.2026 në Tiranë./CNA