Korça atmosferë elektrizuese/ Nata e katërt e Festës së Birrës sjell bum vizitorësh

17 Gusht 2025, 11:44, Aktualitet CNA

Korça atmosferë elektrizuese/ Nata e katërt e Festës

Korça vijon të jetë kryeqendra e festës dhe turizmit në Shqipëri.

Nata e katërt e Festës së Birrës ka sjellë një tjetër bum vizitorësh dhe një atmosferë elektrizuese që ka zgjatur deri në orët e para të mëngjesit.

Mbi skenën madhështore, artistë të njohur si Vesa Luma, Alban Skënderaj dhe këngëtari grek Triantafillos ndezën publikun me performancat e tyre.

Këngë, muzikë live dhe energji që mbajtën gjallë një nga netët më të bukura të festivalit më të madh veror në vend.

Sheshi pranë Terminalit u mbush me mijëra vizitorë e turistë, të cilët së bashku me korçarët e kanë shndërruar festën në një arenë të gëzimit dhe bashkimit.

Pjesëmarrësit nëpërmjet mikrofonit të CNA, nuk kursejnë fjalët për të përshkruar përjetimet e tyre.

Një zonjë nga Tirana, që jeton në SHBA, tha se është e lumtur që për herë të parë po e shijon atmosferën unike të kësaj feste, duke provuar edhe gatimet tradicionale si kërnackat dhe shishqebapin.

"Është hera e parë që vij në Festën e Birrës. Jam nga Tirana por jetoj në Amerikë dhe jam shumë e lumtur që ndodhem sonte këtu. Atmosfera shumë e bukur dhe jam shumë e lumtur që po e shijoj këtë moment. Kemi provuar kërnackat që janë me të vërtetë shumë të shijshme, shishqebapin edhe pitet. Do të qëndrojmë ta shijojmë edhe nesër patjetër", u shpreh pjesëmarrësja.

Dy të rinj shqiptarë që jetojnë në Selaniku dhe në Suedi, e vlerësuan këtë edicion si më të bukurin deri tani, ndërsa një rrëfyen se janë mbledhur me miqtë e tyre posaçërisht vetëm për festën.

"Vijmë nga Greqia, nga Selaniku. Është hera e dytë që po vijmë, është shumë bukur. Bravo Korça. Sivjet është më mirë. Ne sapo kemi ardhur, kemi rreth 1 orë që mbërritëm dhe do shohim si do shkojë nata. Do të qëndrojmë vetëm sot. Do të festoj me shokët, jemi mbledhur të gjithë bashkë, për pushime dhe të kalojmë sa më bukur”, tha i riu.

"Ne kemi ardhur nga Suedia, e kam për herë të parë. Shumë bukur është. Bravo. Kam ardhur me shokët e mi, të cilët disa jetojnë jashtë, Në Greqi, disa në Shqipëri, nga të gjitha vendet. U mblodhëm vetëm për festën", tha për CNA, i riu i ardhur nga Suedia.

Korça atmosferë elektrizuese/ Nata e katërt e Festës

Tradita e përvitshme është kthyer tashmë në një magnet edhe për shqiptarët e jugut, siç shprehet një vizitor nga Tepelena.

"Vijmë çdo vit, jemi nga Tepelena. Jemi shumë të kënaqur. Bravo Korça. Birra, festa, pjesëmarrja, të gjitha më kanë pëlqyer. Do të qëndroj edhe ditën e nesërme, sot po festoj me familjen", u shpreh vizitori.

Korça atmosferë elektrizuese/ Nata e katërt e Festës

Një turist nga Kalabria e Italisë tha se është i impresionuar nga festa dhe se do të rikthehet sërish.

Sipas tij, në Festën e Birrës populli gjen atë që do.

"Vij nga Kalabria, jam për herë të parë këtu. Është një festë e bukur, shumë emocionuese, një festë ku populli gjen atë që do. Kam provuar birrat, kam provuar kërnacet, pra të gjitha këto gatimet tradicionale të Korçës. Sigurisht që do vij edhe natën e fundit”, tha turisti nga Kalabria.

Nata e katërt shënoi një tjetër sukses në kalendarin pesë ditor të Festës së Birrës.

Sot, mbyllja e eventit më të madh veror në Shqipëri pritet të sjellë spektakël edhe më të madh me emrat e njohur të muzikës shqiptare, Aurel Thëllimi, Anxhela Peristeri, NRG Band dhe Fifi.

Korça, për katër netë rresht, është kthyer jo vetëm në kryeqytetin e birrës, por edhe në një qendër ku turizmi, kultura dhe muzika takohen në një festë që çdo vit rritet e bëhet më e madhe./ CNA