web counter
LEXO PA REKLAMA!

SHKARKO APP

App Store
Google Play

E fundit!

x

Kisha Orthodhokse Autoqefale e Shqipërisë në Panairin e Librit: Thesare për jetën, jo thjesht një stendë

14 Nëntor 2025, 12:51, Aktualitet CNA

Kisha Orthodhokse Autoqefale e Shqipërisë në Panairin e Librit:

Kisha Orthodhokse Autoqefale e Shqipërisë është bërë pjesë e Panairit të Librit që do të mbahet nga 12-16 nëntor.

Kisha Orthodhokse Autoqefale e Shqipërisë nuk ka thjesht një stendë në Panairin e Librit, por thesare për jetën.

Janë rreth 170 tituj librash dhe botimesh të Kishës Orthodhokse që përmbajnë një informacion të bollshëm ku përfshihen tema shpirtërore, kulturore, historike, pra veprimtarinë e kishës dhe veprën e kishës përgjatë këtyre më tepër se tri dekadave.

Me bekimin e Kryepiskopit Joan, sigurisht që edhe në këtë vit Kisha Orthodhokse Autoqefale është e pranishme në panairin që po zhvillohet në muajin nëntor të vitit 2025 dhe përfaqësohet me librat e kishës.

Në stendë do të gjeni libra dhe broshura me mësime të çmuara për jetën nga njerëz që jetuan sipas mësimeve të Ungjillit të Shenjtë, shenjtorët, që nga shekujt e parë e deri në kohët e sotme.

Mësimet e tyre e drejtojnë lexuesin të jetojë me urtësi dhe të ecë në rrugën e virtytit. Kisha jonë, duke njohur mirë nevojën që ka vendi ynë për mësimet e Ungjillit të Shenjtë dhe shembullin e jetës shpirtërore, që prej viteve të para të ringritjes së saj, pas regjimit komunist, disponon shtypshkronjën "Ngjallja".

Ajo boton libra me tematika të shumëllojshme që i vijnë në ndihmë lexuesit të çdo moshe dhe përballjes së tij me çështjet bashkëkohore. Për 33 vjet me radhë, ajo boton çdo muaj gazetën "Ngjallja", e cila sot numëron 385 botime, revistën për fëmijë "Gëzohu" dhe libra për fëmijë me metodologji bashkëkohore të mësimdhënies.

Stenda me botimet e Kishës Orthodhokse, përveç paraqitjes së librave, inkurajon leximin si një zakon i mirë për njeriun, sepse leximi sjell rritje në njohuri, pastrim në mendje, rritje në dashuri dhe rritje shpirtërore.

Shën Isaak Siriani mëson që këmbëngulja në lexim pastron mendimet dhe sjell ëmbëlsi në zemër. Leximi e kënaq dhe e gëzon shpirtin.

Shën Joan Gojarti nxit të zhytim mendjen dhe zemrën në libra shpirtërorë dhe të jemi gjithmonë të mbushur, sepse leximet shpirtërore na japin në themel Perëndinë.

Në lutjen për lexim, kërkojmë që jo vetëm t'i çmojmë ato gjëra që janë shkruar, por edhe t'i zbatojmë që duke lexuar jetën, veprën dhe fjalën e shenjtorëve, të mos mëkatojmë, por që të shërbejmë për restaurimin, ndriçimin dhe shenjtërimin tonë, për shpëtimin e shpirtit dhe trashëgiminë e jetës së përjetshme.

Kështu, duke pasur në mendje mësimet e shenjtorëve, botimet e kishës do të realizojnë qëllimin e tyre duke ndihmuar çdo njeri që i lexon dhe që përpiqet t'i zbatojë ato që shkruhen në to. Pra, stenda e Kishës është stendë me thesare për jetën, nuk është thjesht një stendë panairi./ CNA





Lajmet e fundit nga