Inaugurohet godina e re e Konsullatës greke në Korçë: Ministri i Jashtëm grek jep mesazhin e fortë

7 Korrik 2025, 12:43, Aktualitet CNA

Inaugurohet godina e re e Konsullatës greke në Korçë:

Ditën e sotme ështrë inauguruar selia e re e Konsullatës Greke në qytetin e Korçës.

Pjesë e kësaj ceremonie kanë qenë ministri i Jashtëm grek, George Gerapetritis, ministri i Jashtëm i Shqipërisë, Igli Hasani, dhe zyrtarë të tjerë.

Në fjalën e tij, ministri i Jashtëm grek, George Gerapetritis, është shprehur se godina e re e Konsullatës greke në Korçë është një provë për të forcuar më tej lidhjet e minoriteteve.

Ndër të tjera, ministri i Jashtëm grek theksoi se politikat e ndryshimit të kufijve tani i përkasin së kaluarës.

Sipas tij, të gjitha janë histori të vjetra që nuk i interesojnë askujt.

“Kjo ndërtesë ku jetoi dhe ushtroi detyren e tij nobelisti Jorge's Seferis ishte pronë e një shtetasi grek që u ble nga shteti grek.

Jorgo Seferis u frymëzua nga Korça, ku ushtroi detyrën e Konsullit të Përgjithshëm, një qytet që ka qenë pararojë e arsimit si në gjuhën shqipe, ashtu edhe greke.

Vazhduese të pranisë greke janë shkolla 'Omiros', gjimnazi 'Platon' dhe kurset Aristotelis te të cilat shteti grek do të vazhdojë të investojë.

Ambasadat dhe konsullatat tona janë imazhi ynë në botë.

Godina e re e Konsullates inkuadrohet në investimet për digjitalizimin e shërbimeve. Është provë për të forcuar lidhjet e minoritarëve me shtetin amë.

Nga ana jonë kujdesemi të forcojmë marrëdhëniet me fqinjët.

Si vende fqinje ne i japim prioritet stabilitetit, jo vetëm në marrëdhëniet dypalëshe, por edhe shumëpalëshe të Rajonit.

Politikat e ndryshimit të kufijve tani i përkasin së kaluarës.

Dhe të gjitha këto janë histori të vjetra që nuk i interesojnë askujt, siç shkruante Seferis.

Ne nuk kemi për të bërë asnjë hap prapa në të drejtat për minoritetin grek. Prezenca juaj me ministrin e Jashtëm i forcon marrëdhëniet. Minoriteti grek na bashkon dhe është një urë mirëkuptimi mes dy vendeve”, tha ministri Gerapetritis.

Nga ana tjetër, Ministri i Jashtëm shqiptar, z. Igli Hasani, e cilësoi ceremoninë si një akt simbolik që forcon marrëdhëniet mes dy vendeve dhe shërben si dëshmi e vlerave të përbashkëta evropiane.

Ai vlerësoi mbështetjen e Greqisë në rrugëtimin europian të Shqipërisë, duke theksuar se vizita e tij e fundit në Athinë konfirmoi vullnetin për të hapur një kapitull të ri në marrëdhëniet dypalëshe.

Me këtë hap të rëndësishëm, Shqipëria dhe Greqia dëshmojnë vullnetin e përbashkët për të thelluar marrëdhëniet dypalëshe, duke vendosur dialogun, bashkëpunimin dhe respektin ndaj minoriteteve si shtylla të qëndrueshme të fqinjësisë së mirë. Konsullata e re në Korçë nuk është vetëm një strukturë diplomatike, por një simbol i një kapitulli të ri në rrugën drejt partneritetit europian dhe zhvillimit të përbashkët në rajon.

“Të nderuar,

Mirë se vini në Korçë, në qytetin që mishëron dije dhe kulturën shqiptare. Kënaqësi që në këtë qytet me rrënjë të thella europiane përurojmë së bashku Konsullatën greke. Ky është një hap i rëndësishëm që përfaqëson vlera europiane. Ngjarja vjen në një moment të rëndësishëm kur rajoni ka nevojë për stabilitet. Vizita ime në Athinë konfirmoi vullnetin për të hapur një kapitull të ri mes dy vendeve. Greqia mbetet një partner i rëndësishëm për Shqipërinë, jo vetëm si fqinj, por për të ndërtuar të ardhmen. Kjo frymë do të materializohet në vullnet politik për bashkëpunime. Në këtë kuadër mbështetja e Greqisë për anëtarësim në BE ka qenë thelbësore, ne presim mbështetje dhe qasje pozitive për avancimin që kemi bërë me reformat. Seferi mishëron atë që duam të ndërtojmë: një marrëdhënie të bazuar në dialog, mirëkuptim dhe kujtesë. Rinovimi i kësaj Konsullate është një pikë referimi për dialog dhe një urë për qytetarët. Sot kemi mundësinë të ndërtojmë një partneritet të ri mbështetur në vizionin e së ardhmes. Le të jemi brezi që e bën këtë realitet një vizion të vërtetë”, tha Hasani./ CNA