I arrestuar në flagrancë/ Vijon seanca gjyqësore ndaj gazetarit gjobaxhi

16 Shkurt 2026, 11:39, Aktualitet CNA

Sot në Dhomën Penale të Gjykatës së Shkallës së Parë të Juridiksionit të Përgjithshëm Tiranë po zhvillohet seanca për masën e sigurisë për gazetarin gjobaxhi Elio Lazaj.

Seanca ka nisur në orën 09:00 dhe gjyqtar i çështjes është Artan Çupaj.

Kjo seancë vjen pas arrestimit të gazetarit gjobaxhi Elio Lazaj, mesditën e së enjtes nga Policia e Shtetit.

Lazaj akuzohet për veprën penale "Shtrëngimi me anë të kanosjes dhe dhunës për dhënien e pasurisë".

CNA ka zbuluar se për këtë vepër penale sipas Kodit Penal, nenit 109/b, Elio Lazaj rrezikon minimalisht nga dy deri në tetë vite burg në situatën penale që ndodhet tashmë.

Po ashtu CNA ka raportuar se janë sekuestruar katër telefonat e Elio Lazajt, ku pritet të zbërthehen për të zbuluar komunikimet dhe skemën që shkon përtej Elio Lazajt.

Elio Lazaj u arrestua pasi prej dy vitesh kërcënonte, shantazhonte dhe shtrëngonte forcërisht me komunikime, por edhe me shkrimet e tij të vazhdueshme, një zyrtar të shtetit, thjesht dhe vetëm për të plotësuar orekset politike të ndonjë biznesmeni me inicialet A.D., por edhe urdhrat politikë që vinin për të sulmuar zyrtarë të caktuar të opozitës.

CNA ka raportuar më tej se biznesmeni A.D, i cili po interesohet te dëshmitarët dhe njihet si njeri me lidhje të ngushta me kryeprokurorin Olsian Çela dhe të tjerë bashkëpunëtorë të Elio Lazajt, gjobaxhiut të arrestuar nga policia, po qarkullojnë fort materiale dhe po lëvizin duke kontaktuar kallëzuesit, por edhe duke kërkuar që nga Policia e Shtetit të merren dhe të ndryshohen të katër telefonat që i janë sekuestruar gazetarit gjobaxhi.

Jo vetëm kontaktet me personat e tretë, dëshmitarë apo denoncuesit e Elio Lazajt, por edhe lëvizjet e bëra për të ndryshuar telefonat, ka rënë në sy të agjencive ligjzbatuese dhe qartë po duket e gjithë skema, e cila nuk ka qenë thjesht dhe vetëm e bërë nga një dorë si gazetari gjobaxhi Elio Lazaj, por ka pasur të përfshirë edhe persona të tjerë, sa të dirigjuar nga burgu i Durrësit, sa nga mejhanet e Tiranës apo njerëz të lidhur me trafikun e drogës, krimin dhe të ekspozuar përpara SPAK-ut për vepra të ndryshme penale./ CNA