Më 18 shkurt mbahet në Tiranë Ministeriali i Korridorit VIII

16 Shkurt 2026, 10:50, Aktualitet CNA

Ministeriali i Korridorit VIII, me fokus avancimin e bashkëpunimit strategjik në fushën e ndërlidhjes, qëndrueshmërisë dhe integrimit rajonal, do të mbahet në Tiranë, më 18 shkurt. Sesioni ministror nis në orën 10:00 në Pallatin e Brigadave dhe do të drejtohet nga ministrja e Jashtme, Elisa Spiropali.

Në takim do të jenë të pranishme delegacionet e kryesuara nga Antonio Tajani, zëvendëskryeministër dhe ministër i Punëve të Jashtme të Italisë; Tim?ho Mucunski, ministër i Punëve të Jashtme dhe Tregtisë së Jashtme i Maqedonisë së Veriut; Oana-Silvia ?oiu, ministre e Punëve të Jashtme e Rumanisë; si dhe Nikolay Pavlov, zëvendësministër i Punëve të Jashtme i Bullgarisë.

Diskutimet do të fokusohen në avancimin e Korridorit VIII si një bosht strategjik për ndërlidhjen europiane, zhvillimin ekonomik dhe bashkëpunimin rajonal, duke forcuar njëkohësisht rolin e tij në qëndrueshmëri, mobilitetin ushtarak dhe ndërveprueshmëri midis Bashkimit Europian dhe NATO-s.

Agjenda:

Mbërritja | 09:45 - 09:55

Seanca Plenare: “Korridori VIII në momentin strategjik të Evropës: Lidhshmëria, qëndrueshmëria përmes lëvizshmërisë ushtarake dhe prosperiteti i përbashkët përmes integrimit.” | 10:00 – 11:00

Foto familjare | 11:00 – 11:15

Konferencë për shtyp – 11:40 – 12:20 - Salla Nr.1 (në të djathtë të Sallës plenare – Salla “Skënderbeu”).

Në kuadër të këtij aktiviteti do të zhvillohet gjithashtu Forumi Ekonomik i nivelit të lartë “Ndërlidhja Strategjike dhe Rritja Ekonomike Rajonale: Potenciali Ekonomik i Korridorit VIII”.

Ky forum do të mbahet në ambientet e Bankës së Shqipërisë (ish-Hotel Dajti).

Forumi është i konceptuar në katër panele tematike dhe do të zhvillohet nga ora 11:30 deri në orën 16:00.

Ky format do të bëjë bashkë përfaqësues të qeverive, institucioneve europiane, institucioneve financiare ndërkombëtare dhe aktorëve kryesorë ekonomikë për të avancuar dialogun mbi dimensionet ekonomike, të ndërlidhjes dhe investimeve të Korridorit VIII, si dhe për të nxitur projekte konkrete investimi dhe zhvillimi rajonal. /CNA