Hysni Gurra: Gllëk-gllëk më e madhe që do shohim në 5 muajt në vijim

15 Dhjetor 2022, 20:11, Aktualitet CNA

Hysni Gurra: Gllëk-gllëk më e madhe që do shohim në 5

Gazetari Hysni Gurra

Teksa data e zgjedhjeve po afron dita ditës, gazetari Hysni Gurra ka bërë një parashikim për sjelljen politikanëve në 5 muajt në vijim.

Me anë të një statusi në rrjetet sociale, Gurra thotë se politikanët do të sillen si babaxhanë, si të përulur, si punëtorë e të ndershëm, sjellje kjo që sipas tij të krijon të përziera.

Ai deklaron se kjo është praktikë e njohur e partive politike, ndërsa thekson se një nga sëmundjet kronike që ka ky popull është harresa.

Statusi i plotë:

Gllëk-gllëk më e madhe që do shohim në 5 muajt në vijim:

Do të shohim kryetarë bashkishë, anëtarë këshillash bashkiake, deputetë, ministra- hajdutë, falimentues të institucioneve që drejtojnë, arrogantë prepotentë, injorantë e mediokër të cilët do të ulen në sofrat e fshatrave e qyteteve të Shqipërisë, krahëqafë me fshatarët, punëtorët, të papunët, pensionistët, me ata që rrojnë me ndihmë sociale, do bëjnë foto duke pirë ndonjë gotë raki a kafe turke me ta, duke u gajasur, duke u sjellë si babaxhanë, si të përulur, si punëtorë…dhe ajo që do arrijë kulmin për atë ‘gllëk’ (vjell) do jetë sjellja e tyre si të ndershëm. Do të jenë rrjetet sociale plot me të tilla pamje të neveritshme. Më e para më doli para sot nga një fshat i thellë i Shqipërisë. Në një sofër, në një fshat. Ca fshatarë, buzët vesh më vesh e si të handakosur se u kishte shkuar në shtëpi një kryehajdut (deputet/ish-ministër) me ca bashibozukë lokalë, nëpunës administrate, patronazhistë, të rinj në moshë, por të bërë palaço nga makutëria për të vjedhur. U duket në fytyrë makutëria sikur t’ua kishte stampuar në fytyrë ndonjë nallban. Mu shpif pamja kur më doli para.

Kjo është një fyerje e poshtërim për këdo që do bëhet fasadë e një pamje të tillë këto kohë.

Është praktikë e njohur e partive politike, sidomos kësaj që qeveris prej dhjetë vitesh, blerja e ndonjë barkderri në fshat, i cili manipulon, blen, shantazhon gjithë fshatin për të bërë vota për rilindjen.

Të njëjtën metodë përdorin edhe me ndonjë zyrtaruc, e marrin në punë dhe i gjithë fisi i zyrtarucit vihet nën presion për të votuar rilindjen se ndryshe del zyrtaruci nga puna.

Fatkeqësisht, një nga sëmundjet kronike që ka ky popull është harresa.

Por në harrofshin edhe këtë herë fëmijët, motrat, vëllezërit që ju kanë ik jashtë, në emigrim, për shkak të këtyre hajdutëve. Në harrofshin dyfishimin e trefishimin e kostove të jetesës

Në harrofshin vjedhjet dhe arrogancën e këtyre hajdutëve, turpin e paçin vetë, poshtërimin e mbajtëshin me shëndet dhe talljen e paçin të merituar përjetë./ B.A. - CNA.al