E fundit!

13:13 Politikë

"Protestat arritje e madhe"/ Rama: Shqipëria e para në rajon për performancën mjedisore, e 46-ta në botë

Kryeministri Edi Rama në një postim të bërë në rrjetet soc...

Alarm për ujin e pijshëm në Maliq/ Banorët e Tërovës dhe Pendavinjit në protestë

3 Shkurt 2026, 11:04, Aktualitet CNA

Rreth 400 banorë të fshatit Tërovë, në Bashkinë Maliq, po përballen prej më shumë se dy javësh me një problem serioz të ujit të pijshëm. Uji që vjen në rubineta ka aromë të rëndë dhe është i papërdorshëm, jo vetëm për t’u pirë, por as për nevojat bazë të përditshme.

Përballë mungesës së një zgjidhjeje, këtë të martë banorët kanë dalë në protestë, duke kërkuar ndërhyrje të menjëhershme nga institucionet përgjegjëse.

Sipas banorëve, problematika është konstatuar prej kohësh edhe nga Ujësjellësi dhe Bashkia Maliq, por deri më tani nuk janë marrë masa konkrete. Ata shprehen se rrjeti i ujësjellësit është relativisht i ri dhe dyshimet më të mëdha lidhen me burimin e furnizimit.

“Ne kemi problem ujin e pijshëm, kemi rreth 2 javë që uji është me aromë të keqe dhe nuk shërben as edhe për të larë, për të pirë jo e jo. Problemi është se e kanë konstatuar edhe nga Ujësjellësi dhe Bashkia, por s’po marrin masa. Ujësjellësi është i ri, është bërë rreth 10–15 vite më parë dhe është i cilësisë së mirë. Mundësia më e madhe është te burimi. Kemi problem edhe për dush, edhe për gjellë, sepse edhe kur zihet, bie aromë më të keqe.”

Kryeplaku i fshatit thotë se janë kryer verifikime në të gjitha linjat e furnizimit, por ende nuk është gjetur shkaku i ndotjes së ujit. Ndërkohë, familjet janë të detyruara të blejnë ujë, duke përballuar kosto shtesë.

“Kemi rreth 3 javë që kemi probleme me ujin e pijshëm. Kam folur me Ujësjellësin e Korçës, kanë ardhur dhe kanë verifikuar të gjitha linjat. Nuk kemi probleme në linja. Është një problem i vështirë dhe s’po e kuptojmë nga na vjen. Mbase shkak kanë qenë rreshjet e shumta. Banorët kanë blerë ujë, sepse uji që kemi është i papërdorshëm dhe ka rrezik helmimi, sidomos për fëmijët.”

Edhe banorë të tjerë shprehen të shqetësuar për situatën, duke theksuar se kjo problematikë nuk ka ndodhur më parë dhe se mungesa e ujit të pijshëm po u vështirëson jetesën e përditshme.

“Ky problem është prej dy javësh. Uji vjen me aromë shumë të keqe dhe nuk pihet fare. Kjo situatë s’ka ndodhur më parë. Ne tani e blejmë ujin ose e mbushim në vende të tjera. Nuk është vetëm për të pirë, por edhe për të larë e për të gatuar. Kërkojmë që ta shohin seriozisht dhe ta rregullojnë.”

“E kemi pasur gjithmonë të mirë ujin, por prej rreth dy javësh ka aromë shumë të keqe dhe nuk pihet. Ujin e blejmë edhe për të gatuar. Edhe rrobat kur i lajmë, mbeten me aromë të keqe. Është shumë e vështirë për çdo familje.”

E njëjta problematikë raportohet edhe në fshatin Pendavinj, po në Bashkinë Maliq. Në total, rreth 1000 banorë të këtyre zonave po përballen me mungesën e ujit të pijshëm, duke e kthyer këtë situatë në një problem madhor shëndetësor dhe social. Banorët kërkojnë ndërhyrje urgjente, përpara se situata të përkeqësohet më tej./ CNA