Kush është Dimitri Kovalev/ Njeriu që Putini e ka zgjedhur si pasardhësin e tij në krye të Rusisë

15 Maj 2022, 08:08, Blog CNA

Nga Gerrard Kaonga ?Newsweek?

Zërat për një zëvendësim të mundshëm të presidentit rus Vladimir Putin u shtuan sërish për shkak të veprimeve të këtij të fundit gjatë Paradës së përvitshme të organizuar Ditën e Fitores në Moskë më 9 maj.

Pamjet filmike të udhëheqësit rus që bisedon për disa minuta me një burrë gjatë paradës kanë filluar të qarkullojnë në mediat sociale, të shoqëruara me disa spekulime se ky njeri do të zëvendësojë një ditë Vladimir Putinin në krye të Rusisë.

Në fillim ishte piloti ukrainas i garave me makina, Igor Sushko, ai që i shpërndau pamjet në rrjetet sociale, të cilat brenda pak minutash patën mbi 45.000 shikime në faqen e tij në Twitter. Ai pretendoi se njeriu me të cilin po bisedonte Putini quhej Dimitri Kovalev.

?I riu me të cilin Vladimir Putin pati një bisedë të gjatë dhe të sinqertë në Sheshin e Kuq, është kreu i departamentit të administratës presidenciale Dimitri Kovalev?- shkroi ai në profilin e tij në Twitter. ?Newsweek? nuk ka qenë në gjendje që të verifikojë në mënyrë të pavarur, nëse ky është identiteti i vërtetë i burrit që shfaqet përkrah liderit rus.

Në postimin e tij në Twitter, Sushko tha gjithashtu se për momentin identiteti është ende i pakonfirmuar. ?Menjëherë nisën të qarkullojnë thashethemet se ai mund të ishte pasardhësi i zgjedhur i Vladimir Putinit?,- shtoi Sushko.

Edhe uebsajti ?Baza? në platformën në Telegram, i fokusuar kryesisht te lajmet, pretendoi se Vladimir Putini po bisedonte pikërisht me Dimitri Kovalev, dhe se ai është një pasardhës i mundshëm i liderit aktual të Federatës Ruse.

?Baza? zbuloi identitetin e një të riu që bisedoi për diçka me Vladimir Putinin pas përfundimit të Paradës së Fitores?- shkruante uebsajti rus në një postim në rrjetin social Telegram. ?Gjatë transmetimit të drejtpërdrejtë televiziv, kamerat kapën enkas bisedën midis tyre. Disa kanale në Telegram sugjeruan se i riu është një pasardhës i ardhshëm i Putinit në krye të shtetit?- theksohet më tej.

Postimi në Telegram, u shoqërua edhe me foto të tjera të personit që bisedoi me Putinin, ndërsa u dhanë edhe disa detaje të tjera mbi Kovalev. ?Dimitri Kovalev që shihet duke ecur pranë Putinit në ditën e paradës, është 36 vjeç, dhe sipas ?Baza?-s, ai është në krye të njërit prej departamenteve të Administratës Presidenciale?- vijon më tej postimi.

Më tej theksohet se në faqen personale të Kovalev ka shumë foto nga loja e hokejit. Ka shumë të ngjarë që ai ta ketë takuar Putinin duke biseduar mbi pasionin e përbashkët që kanë për këtë sport.

Vladimir Putini ka treguar publikisht dashurinë e tij për hokejin. Gjatë ditëlindjes së tij të 63-të në vitin 2015, ai drejtoi një ekip me yjet rusë të hokejit, tashmë në pension kundër një ekipi amatorësh në një shesh patinazhi olimpik në Soçi.

Ndërsa Putini nuk ka njoftuar publikisht se do të largohet nga posti i udhëheqësit rus që mban, vazhdon të ketë jo pak spekulime mbi gjendjen e tij shëndetësore. Kështu janë përhapur shumë zëra se ai mund të vuajë nga sëmundja e Parkinsonit ose nga një sëmundje tumorale, për shkak të sjelljes gjatë daljeve të tij publike.

Kremlini i ka hedhur poshtë vazhdimisht spekulime të tilla, por kjo nuk i ka ndaluar analistët dhe ekspertët që të hetojnë në detajet më të imta videot e takimeve publike të Putinit. Megjithatë, nuk është vetëm Putini, ai që i është nënshtruar një shqyrtimi të tillë.

Për dekada me radhë, udhëheqësit politikë në poste të larta, kanë qenë subjekt i spekulimeve të shumta mbi gjendjen e tyre shëndetësore, duke u bazuar edhe te detajet më të vogla, si për shembull në rastin kur Riçard Nikson u pa duke djersitur shumë gjatë një debati televiziv me Xhon F.Kenedin në vitin 1960.

Apo kur Donald Trump nisi të gulçojë gjatë një debati televiziv përballë Hilari Klintonit në fushatën presidenciale të vitit 2016. ?Newsweek? ka kontaktuar zyrën e shtypit të Ministrisë së Jashtme të Rusisë për ndonjë koment, por nuk ka marrë asnjë përgjigje mbi këtë çështje./ Përshtatur nga CNA.al