Lirimi i brezit frekuencor 700 MHz/ Nënshkruhet “Deklarata e Përbashkët”.

24 Shkurt 2022, 12:31, Aktualitet CNA

Lirimi i Brezit Frekuencor 700 MHz (njohur si DD2), nga AMA është një nga detyrimet që Shqipëria duhet të përmbushë drejt respektimit të afateve të vendosura nga BE dhe Bashkimi Ndërkombëtar i Telekomunikacionit (ITU).

Për shkak të rëndësisë së këtij procesi, si dhe afateve të afërta në kohë për realizimin e tij, AMA ndërmori një axhendë të ngjeshur e shumë intensive koordinimi me vendet fqinjë me qëllim avancimin e shpejtë.

Në takimin e punës për Direktivën AVMSD të BE-së dhe Lirimin e Brezit frekuncor 700 MHz, u nënshkruan Deklarata dypalëshe Dakordësie, të cilat do të pasohen nga Marrëveshjet përkatëse për lirimin e brezit frekuencor dhe finalizimin e ketij procesi brenda afatave të përcaktuara në aktet ndërkombëtare.

Me nënshkrimin e ?Deklaratës së Përbashkët? institucionale për lirimin e brezit të frekuencave 700 MHz, palët nënshkruese konfirmojnë arritjen e një plani të përputhshëm të frekuencave ndërmjet administratave përkatëse mbi koordinimin e frekuencave numerike tokësore, në brezin 470-694 MHz.

Kryetarja e Autoritetit të Mediave znj.Armela Krasniqi falenderoi të gjithë vendet për angazhimin e tyre në këtë proces tejet të vështirë nga pikpamja e koordinimit teknik.

Për palën Malazeze nënshkroi z. Darko Drgurovic, Drejtor Ekzekutiv Agjencia për Komunikime Elektronike dhe Shërbimeve Postare (Ekip), ndërsa për Maqedoninë e Veriut, z. Jeton Akiku, Drejtor i Agjencisë për Komunikime Elektronike. Shtete të tjera fqinjë si Italia dhe Greqia po ashtu kanë shprehur dakordësinë në parim me Planin e ri Frekuencor të Shqipërisë.

Ndërkohë, znj. Krasniqi, Kryetare e Autoritetit të Mediave Audiovizive dhe z. Xhevat Latifi, Kryetar i Komisionit të Pavarur të Medias në Kosovë nënshkruan një deklaratë të përbashkët bashkëpunimi ndërinstitucional në të cilin vendosin piketat e këtij bashkëpunimi.

Palët në takim dakordësuan mbajtjen e takimeve rajonale në mënyrë periodike si dhe me qëllim bërjen efektive të bashkëpunimit ranë dakord që stafet teknike të vendosin ura direkte komunikimi dhe bashkëpunimi./CNA.al