Vrasja në Tiranë/ Flet sociologu: Familja ka qenë kryekështjella e shoqërisë shqiptare, por është tronditur

4 Qershor 2021, 18:31, Sociale CNA

Pas ngjarjes së rëndë që ndodhi ditën e sotme, ku vjehrri vrau dhëndrin në një kohë që ky i fundit ishte në proces divorci me bashkëshorten, sociologu Zyhdi Dervishi analizoi sipas pikëpamjeve të tij institucionin e familjes në ditët e sotme në Shqipëri. Ai tha se në kohë më të hershme e deri para 30 vitesh, familja ka qenë struktura bazë shoqërore për shqiptarët.

?Familja ka qenë kryekështjella e shoqërisë shqiptare. Mirëpo, kjo kështjellë është tronditur rëndë, sidomos 30 vitet e fundit?, u shpreh z. Dervishi.

Ai tha se për çështjen e krimeve brenda familjes nevojitet një studim kompleks, mbarëkombëtar, për të nxjerrë përfundime të sakta për çdo krahinë. Pas këtij studimi, z. Dervishi propozon që të bëhet një strategji se si mund të pakësohet krimi në familje.

Sociologu foli edhe për rritjen e numrit të divorceve në vend, ku tha se në vendin tonë, çiftet shkojnë drejt divorcit për shkak se martohen pa u njohur mirë dhe thellësisht me njëri tjetrin, akoma edhe në rastet kur nuk kanë një ndërmjetësues në njohjen e tyre.

?Fakti që është rritur shumë numri i divorceve do të thotë se çiftet shqiptare kanë shumë probleme. Shpesh, martesat bëhen midis të panjohurve. Në këtë dinamikë që ka jeta, të rinjtë kanë më pak mundësi për ta njohur njëri tjetrin dhe të rinjtë kanë shumë anë të errëta. Një pjesë e të rinjve, mund të jenë të lidhura me struktura kriminale brenda dhe jashtë vendit. Një pjesë e divorceve përcaktohen nga fakti që martohen emigrantët shqiptarë që jetojnë për një kohë të gjatë jashtë, lidhja bëhet për arsye ekonomike, që vajza të ikë pasi nuk kanë punë këtu. Nuk ka një lidhje të shëndoshë pas një njohje të gjatë dhe të detajuar?, u shpreh sociologu Dervishi.

Zyhdi Dervishi bëri një retrospektivë në kohë, ku shpjegoi mënyrën se si bëheshin martesat në kohën kur institucioni ligjor në Shqipëri ishte kanuni. Ai tha se martesa ishte aleancë fisesh, ku të mençurit e fisit zgjidhnin se kush do të martohej me kë. Për z. Dervishi ajo mënyrë çonte në martesa të shëndetshme, pasi sipas tij, pjesëtarët e fisit e mendonin gjatë paraprakisht nëse një çift përshtatej me njëri tjetrin.

?Një martesë konsiderohej si aleancë fisesh. Në drejtim të përzgjedhjes së djemve dhe vajzave që shkonin me njëri tjetrin, të mençurit e fisit bënin një punë shumë të kujdesshëm parapërgatitore që të martonin djem dhe vajza që i afroheshin në shumë aspekte njëri tjetrit. Këto martesa ishin të qëndrueshme, bëheshin analiza shumë të detajuara?, u shpreh z. Dervishi.

Ai tha se ligji në ditët e sotme, sipas tij, nuk përfillet kur bëhet fjalë për çështje familjare. Ai shtoi disa mënyra që i konsideron efikase për të shmangur dhunën në familje, siç është ndërtimi i disa shtëpive që gratë që dhunohen të largohen nga bashkëshorti i tyre si edhe krijimi i mundësisë së punësimit për gratë e dhunuara./euronews