Kryetarja e LSI-së, Monika Kryemadhi në një prononcim për mediat nga Mbrostari I Fierit, ka folur në lidhje me skandalin e inceneratorit të Fierit, I denoncuar së fundi nga opozita por edhe nga mediat.

Kryemadhi e cilësoi inceneratorin e Fierit, një projekt grabitës, ndërsa shtoi se ky incenerator nuk është gjë tjetër por do të jetë gropa e cila mbyti qeverinë.

“Në fakt pas një takimi që pata në fshatin Verri me protestat  e shumta që ka patur për të mos lejuar ndërtimin e inceneratorit në zonën që shikojmë këtu mbrapa, i cili është në mes të një parajse bujqësore, një nga tokat më të pasura bujqësore, e cila është një hambar për bujqësinë shqiptare dhe vjen vetëm për të krijuar një projekt grabitës nga Edi Rama & Company, në mënyrë të tillë për të vjedhur jo vetëm një dorë parash ndërmjet incerenatorëve, por të krijuar fatkeqësinë më të madhe në këtë zonë që është shpopullimi.

Ky incenerator nuk është gjë tjetër por do të jetë gropa e cila mbyti qeverinë e Edi Ramës, mbyti të gjithë interesaxhinjtë rreth Edi Ramës dhe jo vetëm që do të jetë pika e shkëputjes përfundimtare të së keqes nga ky vend, por do të jetë dhe ai moment, që faktikisht do t’i japë verdiktin përfundimtar dhe dënimin përfundimtar më 25 prill Edi Ramës dhe rilindjes dhe të gjithë njerëzve, të cilët pasurohen jo vetëm duke grabitur paratë e shtetit, por pasurohen duke vrarë shpresën dhe duke shpopulluar Shqipërinë.”-tha Kryemadhi.

Paska Milo ka bërë një analizë të Partisë Socialiste, për të cilën thotë se nuk përfaqëson më të majtën shqiptare.

Në një analizë për Panorama, Milo thotë se procesi i shthurjes së saj nisi në fillim të viteve 2000, kur ajo e ndodhur në pushtet, u miklua nga favoret e tij, u infektua nga korrupsioni dhe humbi frymën demokratike të përfaqësimit të shtresave sociale që duhej të përfaqësonte.

Sipas tij ndryshimi dramatic ndodhi pas largimit të Fatos Nanos, dhe ardhjen e Edi Ramës në krye të PS-së.

“Procesi i transformimit të së majtës shqiptare, veçanërisht i partisë më të madhe të saj, asaj Socialiste, në një organizatë politike pragmatiste dhe eklektike, filloi pas vitit 2005, kur ndodhi edhe ndryshimi në udhëheqjen e saj, largimi i Fatos Nanos dhe ardhja e Edi Ramës në postin e kryetarit të saj. Vitet 2005-2013, që janë vitet e opozitës për Partinë Socialiste, ndonëse u ruajtën formalisht kolonat programore të një partie të majtë, shënuan fillimin e desocializimit të saj programor dhe të “çlirimit” të saj nga vlerat dhe traditat pozitive të trashëguara, që për fat të mirë të saj, identifikoheshin me emrin e partisë.

Jo vetëm rikompozimi i simboleve partiake apo ndryshimi i ngjyrave të flamurit të partisë, por edhe deklaratat e metodat thellësisht personale dhe autoritare të kryetarit të PS-së paralajmëruan “varrosjen” politike të kufomës së vjetër që kundërmonte komunizëm dhe ngritjen graduale brenda saj të një krijese të re që do të kishte në themel të saj vulën dhe botëkuptimin personal të Edi Ramës që nuk kishte asnjë lidhje me konceptet e së majtës moderne europiane.”-shkruan Milo.

Sipas tij, jo pa qëllim në këtë kohë, në përgatitje të këtij ndryshimi cilësor, kryetari i partisë më të madhe opozitare deklaronte se ajo nuk ishte as e majtë dhe as e djathtë, se ai personalisht nuk ishte politikan!

“Për herë të fundit Edi Rama u shfaq formalisht si socialist dhe për herë të fundit para se t’i jepte lamtumirën “gërmadhës” komuniste, alias Partisë Socialiste, ai paraqiti programin elektoral për zgjedhjet e vitit 2013 që ishte edhe ceremonia mortore e saj. “Rilindja”, jo pa qëllim ishte zgjedhur ky emër, ishte gati si strukturë për të zëvendësuar de facto të vjetrën që po varrosej e për të qeverisur vendin.

Socialistët nuk e kuptuan që me votat dhe me duart e tyre varrosën historinë dhe vlerat më të mira të tyre.”-shkruan ndër të tjera Milo.

Kryetari i Partisë Demokratike, Lulzim Basha i është përgjigjur “dhëmb për dhëmb” akuzave të kryebashkiakut të Tiranës, Erion Veliaj.

Në një deklaratë për mediat, Basha tha se të hënën do të dorëzohet një tjetër padi për shpifje ndaj “vemjes”, siç iu drejtua ai kryebashkiakut.

“ Për të tre gënjeshtrat e vemies që bëhen për të hequr vëmendjen nga afera ku është kapur ai dhe shefi i tij është dorëzuar padi penale në Prokurori. Si për vilat dhe makinat është dorëzuar padia dhe të hënën do të dorëzohet padia edhe për gënjeshtrën që ka bërë për inceneratorët.

Ky është studimi i bashkisë së Tiranës për inceneratorët, që kontenierët të futeshin nën tokë dhe trajtimi në Sharrë të bëhej për 12 euro, nga 29 euro që i bën ky hajduti bashkë me hajdutët e tjerë. Besoj se këto janë shifrat që kishte përgatitur Banka Botërore dhe me çfarë çmimi po e bëjnë hajdutët Rama, Veliaj dhe Ahmetaj.

Unë e di që kanë kapur disa media prej fyti po shumë shpejt do të përballen dhe në prokuri dhe në gjykatë.

Ky studim që u blloku po të vihej në punë qytetarët e Tiranës do të kishin trajtim me kontenierë nën tokë ndërsa kostoja e përpunimit të tyre do të ishte 12 euro krahasuar me 29 euro, këtu keni edhe arsyen pse bllokuan studimin e fizibilitetit të Bankës Botërore.”-tha Basha./ CNA.al