Covid-19 nuk i ndal shqiptarët për pushime/ Nisin udhëtimet me çarter drejt Antalias

15 Korrik 2020, 07:53, Sociale CNA

Ndryshe nga 1 vit më parë, kur fluturimet me çarter drejt Turqisë nisnin në muajin maj, për shkak të situatës nga Covid-19, turizmi i çarterave nisi dje në të gjithë vendin. Operatorët e ofrimit të këtyre shërbimeve pohojnë se interesimi për të udhëtuar në situatë pandemie është normal.

Zonja Bardhi nga një agjensi turistike pohon se në krahasim me një vit në parë po udhëtojnë rreth 70% udhëtarë më pak në ditë. ?Dje është nisur avioni i parë me 160 turistë, kryesisht prindër me fëmijë që janë nisur drejt Turqisë. Udhëtime me çarter do të ketë 5 ditë në javë dhe pritet të udhëtojnë 900 turistë.

Por, kapaciteti i lëvizjeve të turistëve është ulur në krahasim me një vit më parë. Udhëtimet me çarter një vit më parë nisnin që në muajin maj, kurse këtë vit nisën në mesin e muajit korrik për shkak të pandemisë. Në ditë 1 vit më parë niseshin rreth 500 turistë me çarter (3 çarter me 180 udhëtarë). ?Kapaciteti është ulur prej nesh, pasi mendojmë se një pjesë e shqiptarëve nuk do të pushojnë, pasi nuk kanë leje për pushime, një pjesë janë të frikësuar dhe nuk duan të udhëtojnë. Po ashtu një pjesë e konsiderueshme që jetojnë jashtë e kanë të pamundur të vijnë në Shqipëri për të bërë pushime me familjen drejt Turqisë, siç ka ndodhur në vitet e mëparshme. Për ata që po ikin nuk janë problem çmimet. ?

Sipas përfaqësues të agjencisë turistike, dy janë arsyet pse shqiptarët po zgjedhin të pushojnë në destinacionet e Turqisë. ?Së pari, Turqia është e vetmja mundësi për të udhëtuar jashtë, për shkak të mbylljes të kufijve me vendet e tjera. Së dyti, nga komunikimet që kam pasur me udhëtarët shprehen se preferojnë të pushojnë drejt Turqisë për shkak të çmimeve më të ulëta se në jug të Shqipërisë. Në Turqi nuk ka ulje të çmimeve në krahasim me vjet, pasi resortet nuk po punojnë me kapacitet të plotë dhe zbatojnë rigorozitet protokollin e sigurisë kundër Covid-19?.

Në vendin tonë janë 5 agjenci turistike që operojnë me udhëtimet çarter me Turqinë. Me nisjen e sezonit, secili operator më vete parashikon të kryejë 1 udhëtim me çarter çdo javë.

Antalia ka qenë një destinacion mjaft i preferuar i shqiptarëve për të kaluar pushimet e verës. Sipas të dhënave nga Tirana International Airort (TIA), në vitin 2019 drejt Antalias dhe kthim udhëtuan me çarter 61,700 pasagjerë me rënie 2,1% krahasuar me 2018 ku udhëtuan 63,024.

Sidomos në 2017-n, udhëtimet me çarter drejt Antalias u rritën me 53%, kurse numri i pasagjerëve që udhëtuan me çarter drejt Antalias dhe kthim ishte rreth 62.4 mijë persona. Pas 2017-s, fluksi i pushuesve drejt Antalias shënoi një rënie të lehtë.

Në 2019-n, Egjipti ishte një tjetër destinacion që u rikthye në modë, pas qetësimit të konflikteve që i larguan për një farë periudhe pushuesit nga e gjithë bota. Në 2019-n, ndonëse në nivele të ulëta rifilluan çarterat drejt Sharm El Sheikut dhe Hurgadas, me një total prej rreth 4 400 pasagjerësh.

Por, këtë vit, e vetmja alternativë që kanë shqiptarët për të pushuar jashtë mbetet Turqia./Monitor