web counter
LEXO PA REKLAMA!

SHKARKO APP

App Store
Google Play

E fundit!

x

"Biznesi i vogël po falimenton"/ Kreu i shoqatës: Nuk duam lëmoshë, qeveria të hapë ekonominë

6 Maj 2020, 14:19, Politikë CNA

Kryetari i Shoqatës së Biznesit të Vogël në Shqipëri Albert Nasto, pas takimit me kryetarin e Republikës së Re Lulzim Basha, ngriti alarmin se biznesi është në gjendje shumë të rëndë dhe po shkon drejt falimentimit.

Nasto tha se gjendja po shkon drejt një degradimi total, ndërsa pretendon se paketat e qeverisë nuk përfshijnë as gjysmën e atyre që duhet të ishin.

Ai deklaroi se biznesi nuk po kërkon lëmoshë, pasi thekson se paketat e qeverisë janë para që i takojnë atyre në gjendje të tilla të jashtëzakonshme.

“Atëherë qeveria ka miratuar dy paketa, të cilat i quan paga lufte, një 260 mijë lekë dhe një 400 mijë lekë të vjetra. Asnjë paketë nuk përfshin më shumë se gjysmën e atyre që duhet të ishin. Për ne nuk janë paketa ndihme, për biznesin, janë sociale. Nuk janë paga lufte se në luftë nuk paguhen taksa. Biznesi po shkon çdo ditë drejt falimentimit. Nuk ka asnjë plan ekonomik nga qeveria. Të gjitha këto paketa nuk e ndihmojnë biznesin. Këto po na degradojnë. Duket sikur ne duam lëmoshë, ne nuk po kërkojmë lëmoshë. Në fatkeqësi natyrore thuhet se shteti duhet t’i dëmshpërblejë të gjithë. Bashkitë nuk kanë hequr taksat. Ne po paguajmë taksa njësoj. Kolegëve tanë po i vijnë faturat sikur të ishin në punë. Ne po shprehim shqetësimin tonë. Nuk kalohet kriza me 260-400 mijë lekë. Duhet hedhur lekë. Duhet ndjekur modele evropiane. Shikoni Kosovën, Maqedoninë. Deri tani ndihma ka qenë tallëse. Nëse ne jemi bërë për këtë pagesë, atëherë kurrë mos e marrshim. Janë 250-300 mijë të punësuar në biznesin e vogël. Çfarë do bëhet me ne zoti kryeministër”, u shpreh ai, ndërsa i bëri një kërkesë kryeministrit Edi Rama përe të hapur bizneset.

“Kryeministër hap ekonominë, duhet të hapen subjektet, por nuk hapen ato pa qytetarin. Qeveria thotë hapuni, por e mban qytetarin në shtëpi. Kjo që të mos na paguajë detyrimet. Qeveria duhet të emetojë lekë, grante për biznesin e vogël. Ministria e Financave dhe pushteti lokal i ka listat. Nuk ka nevojë për aplikime. Nëse vazhdohet kështu, këtu ka për të ndodhur një krizë e paparë ndonjëherë. Për ta mbyllur, gjendja është e rëndë. Lehtësim taksash dhe hapje të biznesit, bashkëshoqëruar me lejimin e qytetarëve për të lëvizur”, nënvizoi Nasto./ CNA.al





Lajmet e fundit nga