Kush është Arjan Ndoj i akuzuar si i lidhur me bandat/ 10-fishoi pasurinë në 4 vite, 21 apartamente në Shëngjin

1 Nëntor 2019, 17:38, Kronika CNA

Arjan Ndoji që mbeti i plagosur pasditen e kësaj të premte, nuk është një emër i panjohur. Pak ditë më parë, ai u akuzua se ka lidhje me bandat kriminale nga ana e kryeministrit Edi Rama, edhe pse nuk u përmend me emër.

Akuza këto që u përsëritën edhe nga ana e zv.kryeministrit Erjon Braçe. Më 19 korrik 2018, Ilia Ilia, avokati që ka mbrojtur Lul Berishën është dhunuar fizikisht nga dy persona teksa dilte nga Gjykata. Avokati akuzoi se pas ngjarjes fshihet prokurori Arjan Ndoja, me të cilin ka debatuar gjatë një seance gjyqësore.

?Kam dalë nga seanca gjyqësore e Gjykatës së durrësit rreth orës 10:30 dhe po ikja nga Prokuroria. Më del një person përpara dhe më thotë ti je ai që i ke bërë karshillëk prokurorit Arjan Ndoja dje në seancë gjyqësore, ke bërë të fortin. I thash kush je ti, ai më ofendoi, i ktheva të njëjtën përgjigje. Jam goditur nga ky dhe personi tjetër që erdhi. Dje në seancë gjyqësore më kanosi prokurori?, denoncoi avokati Ilia.

Policia bëri identifikimin e njërit prej autorëve që dhunoi Ilian, dhe ai ishte Mondi Voga, miku i ngushtë i prokurorit Arjan Ndoj. Ndaj Ndojit nisi një hetim asokohe nga Prokuroria, por ai ia doli të shfajësohej duke thënë se me avokatin Ilia ka patur një debat verbal por nuk ka lidhje me të, raporton TemA.

Arjan Ndoj është emëruar prokuror në qytetin e Durrësit në vitin 2008, pasi ish-kryeprokurori Theodhori Sollaku e shkarkoi atë nga detyra si prokuror. Gjatë periudhës së ?pushimit?, Ndoj është fokusuar tek avokatia, ku ka qenë avokat i Arjan Selimit. Më interesante është pasuria e Ndojit, ku sipas të dhënave zyrtare te ?Open Data?, del se ai ka arritur që të dhjetëfishojë pasurinë e tij për vetëm 4 vite! Në vitin 2004, Ndoj ka patur 20 mijë euro dhe 200 mijë lekë. Në vitin 2008, pasuria e tij, është plot 760 mijë euro. Arsyetimi i prokurorit është se pasuria është siguruar nga puna e tij si avokat? por këtë profesion ai e ka ushtruar për vetëm 3 muaj. Ndërkohë që pasuria e tij ka vijuar të shtohet përgjatë viteve. Në 2016, Ndoj ka deklaruar se ka në pronësi 21 apartamente në Shëngjin, bodrume, vreshta, si dhe një truall në Krujë./CNA.al