E fundit!

13:47 Live Updates

Karburantet në Shqipëri/ Një krizë besimi mes çmimeve dhe transparencës

Çmimet e karburantit sot dhe roli i sh...

Zgjedhjet e djeshme mes Shilës dhe Karibdës

1 Korrik 2019, 17:07, Aktualitet CNA

Nga Arian Galdini

– Shqiptarët meritojnë të vërtetën.

Dhe e vërteta duhet thënë përtej amokut propagandistik.

Pjesëmarrja e ulët në votime është një çështje e hershme që dëshmon mosbesimin dhe refuzimin e kahkohëshëm të kësaj klase politike, të këtij Klubi të Plaçkaxhinjve të majtë e të djathtë të politikës shqiptare.

Ka kohë, mbi një dekadë e gjysëm që pjesëmarrja në zgjedhjet shqiptare mezi endet nën 50%. Pra le ta themi të vërtetën të plotë: 50% e shqiptarëve në listat e votimit ose janë bojkotues të kahershëm ose janë emigrantë. Kemi pra vetëm gjysmën e shqiptarëve që ishin dje në përballje me vendimin nëse do shkonin të votonin apo të notonin.

Ata që zgjodhën të votonin, nuk zgjodhën as Edi Ramën, as zgjedhjet monopartiake, as diktaturën. Kjo ishte pjesë e amokut propagandistik të “revolucionarëve”.

Mundet që shumica e atyre që votuan ishin socialistë, mundet. Mundet që shumica absolute e tyre ishin pro Edi Ramës, mundet.

Por demokracia a e dini pse vlen dhe pse është e bukur?

Sepse ishte së paku 1 votues, 1 qytetar në Republikën e Shqipërisë që nuk pranoi ti shihte zgjedhjet e 30 as si çështje të partive, as të Presidentit, as të Kryeministrit, as të Qeverisë, as të Revolucionit e as të askujt tjetër, përveçse si të së drejtës së tij për të vendosur vetë se çfarë i quan zgjedhjet, çfarë bën me votën e tij/saj, e si e shpreh vullnetin.

Demokracia funksionon dhe vlen vetëm brenda natyrës së saj, vetëm me instrumentat e saj.

Demokracia funksionon nëse mbrohet dhe ushtrohet e lirë e drejta e kujtdo për ti menduar gjërat si do e si mundet.

Nuk ka Guru e as Udhëheqës në demokraci.

Nuk ka as përkufizues të tjetrit në demokraci.

Edhe një qytetar i vetëm ka të drejtë ti mendojë gjërat si do e si mundet.

Po nuk u kuptua kjo, atëherë mund të luhet për pushtet, por askush nuk mund të thotë se po lufton për parime e vlera të larta demokratike.

Ti thuash dikujt fasadë, votues të diktaturës, e ku di unë çfarë përkufizimesh të fëlliqta e të liga kam lexuar e dëgjuar dje dhe sot ngado nëpër rrjete sociale e media, dëshmon se ti je vetëm duke numëruar radhët.

Pra nuk të interesojnë as idetë e as parimet, por numrat e rreshtit tënd.

Dhe kjo vetëm demokratike nuk është.

Të vijmë tek unë si individ dhe si Kryetar Partie.

Kam lexuar e dëgjuar akuza pafund këto 5 a 6 muaj revolucion turistik.

Më kanë quajtur mercenar, komunist, të shitur tek Edi Rama, fasadë të Edi Ramës e gjithëfarë marrëzie tjetër.

Dhe a e dini pse e kanë bërë këtë?

Sepse unë si individ por edhe si qytetar, si pedagog, si prind, e madje edhe si politikan e Kryetar Partie, kam qëndruar fort për idetë dhe parimet që besoj.

Ore me shumë gjasa unë mund të jem krejt i vetëm në besimin dhe qëndrimin tim.

Ore mua mund të mos më mbështesin në qëndrimin dhe mendimin tim as familjarët e mij, as partia ime, askush.

Por a e kam unë të drejtën si qytetar ti mendoj gjërat si dua e si mundem?

Kush e vendos sot se kush ka të drejtë në mendimin e vetë?

Ose Gjykata ose Koha.

Asnjë individ tjetër jashtë meje, nuk mund të më përkufizojë mua dhe askënd tjetër. Askush.

Askush nuk mund të më përcaktojë, etiketojë apo quajë mua çfarë mendon ai apo ajo, pse unë mendoj ndryshe.

Askush.

Askush nuk mund të më kufizojë mua lirinë time. Askush.

E askush nuk mund të më cënojë mua integritetin tim pse unë mendoj ndryshe. Askush.

Liria dhe demokracia funksionojnë për pakicën, për zërin e vetmuar, për njeriun dhe qytetarin e dobët.

Të trysnosh, shantazhosh, fyesh, shash, etiketosh një qytetar pse mendon ndryshe, është larg po shumë larg demokracisë dhe lirisë.

Edhe i vetmuar po të jem, do ta mbroj të drejtën time dhe lirinë time ti them me zë të lartë gjërat si i mendoj.

E meqë gjykatat në Shqipëri janë ende në plazh si revolucioni, unë ftoj këdo tia lërë Kohës të drejtën e Gjyqësisë se kush ka të drejtë.

Koha do ta tregojë e dëftojë qartazi nëse unë qytetari i vetmuar, jam në të drejtën apo gabuarën.

Por qenie të tjera njerëzore mbi këtë tokë, që mund të më thonë se unë jam gabim, nuk ekzistojnë.

Asnjë njeri mbi këtë tokë nuk e ka autoritetin suprem të Gjykatësit Kohë për të më etiketuar apo përkufizuar mua.

Të thëna sa më sipër, vij tek argumenti i fundit.

Nëse amoku propagandistik dhe dhuna e shantazhi antizgjedhje i futën dhëmbët e tyre çakallore dhe çizmet e tyre të ndyta edhe tek mua që jam zë publik, politikan, pedagog dhe qytetar i vendosur për të qëndruar edhe i vetëm, si mendoni se ka ndikuar tek qytetarët e thjeshtë?

Duhej kurajo e madhe dje për të votuar.

Linçimi publik i bërë dje gjatë gjithë ditës në facebook e ngado, nga operatorët revolucionarë turistikë antizgjedhje, u shndërrua në një peshë të rëndë sa mali për qytetarin e thjeshtë.

Qytetari i thjeshtë dhe i ndershëm dje u shantazhua haptazi.

Gjashtë muaj molotov dhe dje papushim linçim barbar.

Dilema ku u vendos qytetari ishte fatale dhe e papërballueshme për njeriun e thjeshtë dhe halleplotë.

Amoku propagandistik i tha qytetarit të thjeshtë se po nuk votove je me molotivin, ndërsa po votove je me Diktaturën e Edi Ramës.

A mundej dje qytetari i thjeshtë dhe i dobët ta merte përsipër këtë vendim-marrje kaq të rëndë shantazhuese mes Molotovit dhe Ed Diktatorit?

Sigurisht që jo.

Zgjedhjet e djeshme ishin mes Shilës dhe Karibdës.

Edi Rama po vallëzonte e lodronte si hajdut i shpërblyer Diktator.

Ndërsa Opozita po zëvendësonte Molotovin me Linçimin.

Pra dy Diktatura përballë qytetarit.

Ky Klub Plaçkaxhinjsh të Majtë e të Djathtë, duke filluar nga Plaçkaxhiu Diktator Edi Rama e deri tek Plaçkaxhinjtë Molotovistë të Opozitës, i vranë zgjedhjet dje me ndërgjegje.

Sepse ata janë bashkë.

Ata duan luftën që të lejohen të bëjnë dashuri.

Janë bashkë.

Pakti u është prishur sepse nuk po i lejon SHBA dhe BE që as të bëjnë dot luftë e as të bëjnë dashuri.

Prandaj po e vuajnë shumë këtë pamundësi.

Ata janë bashkë, sepse bashkë i vranë zgjedhjet.

Por bashkë do ikin. Bashkë.

Dje ua vranë shqiptarëve zgjedhjet.

Por shqiptarët po dje, me paqen dhe qetësinë e tyre, u vranë plaçkaxhinjve çdo alibi e mundësi për njê ujdi të re të fëlliqët.

Zgjedhjet e djeshme ishin data e skadencës për Klubin e Plaçkaxhinjve.

Plaçkaxhiu Edi Rama dhe plaçkaxhinjtë e tij në Rilindje ashtu sikurse edhe plaçkaxhinjtë në Revolucionin Turistik të Opozitës, do takohen shumë shpejt me drejtësinë.

SHBA dhe BE do të jenë besnike me shqiptarët dhe Shqipërinë. Një kohë e re po vjen.