Ekskluzive-Faktet dhe analiza/ Lulzim Basha fshehu katër vjet dosjen “Xhafaj”

14 Maj 2018, 10:47, Aktualitet CNA

Në vitin 2014 dosja e vëllait të Fatmir Xhafaj, ministrit aktual të Brendshëm, ka mbërritur në Shqipëri dhe për mbërritjen e saj ka pasur dijeni edhe kreu i PD-së, Lulzim Basha. Nëpërmjet Adriatik Llallës, Besim Hajdarmatajt apo strukturave të PD-së nëpër institucione, Basha ka qënë në dijeni të dosjes së Agron Xhafajt.

I vetmi që ka folur dhe ka mbajtur qëndrim ka qënë Sali Berisha. Lulzim Basha ka heshur edhe pse dosjen e ka pasur në zyrën e tij.

Gjatë reformës në drejtësi, Basha tha se nuk do ta pranonte, por më pas u nënshtrua dhe çertifikoi atë që përgatiti Fatmir Xhafa. Luli e kishte në zyrë dosjen e të vëllait të Xhafaj, por atëherë nuk e nxori.

Gjatë kohës së çadrës, Lulzim Basha tha se Xhafaj nuk do të hynte kurrë në zyrën e Ministrit të Brendshëm, pa kaluar mbi trupin e tij dhe të demokratëve. Xhafaj hyri në zyrë, dhe Lulzim Basha sërish nuk e publikoi dosjen.

Sot kur PD-ja është më e përçarë se kurrë, në kuotat më minimale historike. Kur vetë Luli pëlqyeshmërinë e ka njëlloj si Ilir Meta, del dosja “Xhafaj” e cila ishte mbajtur e mbyllur me çelës për katër vite nga kreu i PD-së.

Dosja më në fund u publikua dhe ndoshta do të ?hajë? kokën e ministrit të Brendshëm, por përtej kësaj publikimi është bërë me qëllim që të nxisë një bashkim të bazës së PD-së dhe rritje të mbështetjes ndaj Lulzim Bashës, që në sondazhet e bëra në muajt e fundit nga “Konrad Adenauer”, partneri strategjik i PD, Basha është në kuotat 17-20%, ndërsa PD rreth 25%.

Në këto kushte, kur Lulzim Basha po humbet mbështetjen dhe në prag të zgjedhjeve lokale është gati i pashpresë, publikon dosjen Xhafaj. Me një gur vret dy zogj. Dëmton personin më të fuqishëm në qeveri pas kryeministrit dhe forcon pozitat në PD.

Në fakt e para është e sigurtë. Pra dëmtimi i Xhafajt, dhe ndoshta edhe largimi i tij. Por, pozitat e Lulit në PD dhe në opinionin publik nuk ka dosje dhe skandal që i rregullon. Prandaj bashkë me publikimin e dosjes Xhafaj dhe me largimin e ministrit të Brendshëm që të shpëtonte PD-ja dhe të kishim një opozitë të vërtetë do të ishte mirë të largohej edhe Basha.