Skandali i drejtësisë dhe korrupsioni me pronat/ Ja si është hipotekuar bregu i detit

7 Prill 2018, 10:23, Aktualitet CNA

Abuzimet me pronat në bregdet ndër vite janë kthyer në një praktikë normale.

CNA.al sjell një rast të pastër abuzimi që ka ndodhur me pronat në bregdetin e Gjirit të Lalzit.

Bregu i detit, i cili quhet ranishte, është hipotekuar, duke u kthyer në pronë private.

Zyra e regjistrimit të pasurive të paluajtshme në Durrës ka regjistruar ranishten si pasuri private, duke marrë për bazë një vendim gjykate.

Një sipërfaqe toke prej 3.6 dynym e ndarë sipas ligjit 7501,e ndodhur në fshatin Draç, është regjistruar në Hipotekën e Durrësit si ranishte, me anë të një vendimi gjykate.

Ll.M. ka denoncuar skandalin se si ka ndodhur grabitja e pronës me bekimin e institucioneve të drejtësisë.

?Kemi shumë vite që jemi në një proces gjyqësor me familjen R. H. Ata janë nga fshati Likmetaj. Aty ku kemi jetuar në fshatin Shën Pjetër, kemi pasur shtëpitë e vjetra, kur u nda toka nga Komisioni i Kthimit të Pronave me Ligjin 7501 ne kemi marrë të gjithë pjesët e tokës. Unë kam 63 dynym tokë të regjistruar në kadastrën e Durrësit. Nga këto 63 dynym tokë më janë kthyer dhe më janë njohur 59 dynym. Me 3.6 dynym, unë bie ndesh me një familje e cila ka marrë komplet bregun e detit. Ata kanë dokument pronësie, livadh, pyll, pemishte dhe ullishte, por kanë marrë ranishten.

Janë 292 dynum toke. Familja me të cilën në jemi në kontest,192 dynum toke i ka tek pjesa e ranishtes, kurse pjesa tjetër është tokë-arë?, ka treguar denoncuesi LL.M.

Referuar dosjes së Hipotekës, skandali merr udhë që në vitin 2005, ku me anë të vendimit numër 2112 të datës 29.09.2005, e marrë nga tashmë ish- gjyqtarja e Gjykatës së Shkallës së parë në Durrës, Majlinda Andrea,është bërë kalimi i trashëgimisë për këtë pronë, nga babai R.H, tek fëmijët e tij.

Ndërkohë Agjencia e Kthimit dhe Kompesimit të Pronave me vendimin numër 360 të datës 25.06.2009 ka vendosur shfuqizimin e vendimit numër 485 të datës 22.07.1999 të Komisioni i Kthimit të Pronave, Qarkut Durrës dhe e ka kthyer çështjen për rishqyrtim pranë Hipotekës së Durrësit me disa detyra detyra të përcaktuara. Pas këtij vendimi Agjencia e Kthimit dhe Kompesimit të Pronave është paditur në Gjykatën e Shkallës së Parë në Tiranë.

Kështu, ecejaket në gjykatë kanë vijuar më tej dhe skandali vetëm sa është thelluar.

Gjyqtari Shkëlqim Mustafa me vendimi numër 5982 të datës 29.05.2013, hedh poshtë pretendimin e Agjencisë së Kthimit dhe Kompesimit të Pronave, dhe njeh pronarë të sipërfaqes familjen e R. H.

Përplasja në gjykatë, me Agjencinë e Kthimit dhe Kompesimit të Pronave nuk ka përfunduar këtu dhe për më tepër as skandali.

Më 15.07.2014 me vendimin numër 2969, trupi gjykues i Gjykatës së Apelit në Tiranë, i përbërë, nga Hysni Demiraj, kryesues dhe anëtarët Metush Saraçi dhe Valdete Hoxha, vendosin të ndryshojnë vendimin e Gjykatës së Shkallës së parë, pjesërisht, por sërish duke njohur pronar familjen e R. H. për sipërfaqen 69.765 metër katror, nga 74.457 metër katror që i njihte vendimi i gjykatës së shkallës së parë.

Pas këtij vendimi me 17.11.2014 Hipoteka e Durrësit i është drejtuar Komunës Ishëm që të dërgojë dokumentacionin për regjistrimin e pasurisë në emër të trashëgimtarëve të familjes R.H.

Por, trashëgimtarët e R.H i janë drejtuar Gjykatës së Apelit ku i kanë kërkuar lëshim të urdhrit të ekzekutimit të vendimit civil numër 29 69 të datës 15.07,2014 të Gjykatës së Apelit në Tiranë.

Me 22.10.2015, Gjykata e Apelit me të njëjtën trupë gjykuese që kishte në vendimin e kaluar me gjyqtarin Hysni Demiraj, kryesues dhe anëtarët Metush Saraçi dhe Valdete Hoxha, kanë lëshuar urdhrin e ekzekutimit .

Ka mjaftuar ky vendim që Zyra e regjistrimit të pasurive të Paluajtshme në Durrës, me 17.03.2015, të regjistrojë si ranishte sipërfaqen prej prej 15.340 metër katror me firmën e drejtorit Jurgis Çyrbja.

Kështu, me vendim gjykate, ku një pronë e ndarë sipas ligjit 7501, ka përfunduar e regjistruar si ranishte.

CNA.al do të sjell ditët në vijim se kush qëndron pas këtij skandali, ku ranishtja bëhet me pronar dhe prona e ndarë nga Komisioni i Kthimit të Pronave me Ligjin 7501, regjistrohet si ranishte. /CNA.al