Biznesi i 18 majit

11 Gusht 2017, 19:15, Aktualitet CNA

Lulzim Bashës po i kërkojnë nga brenda vetë partisë së tij dhe nga e djathta që të tërheqë ministrat teknikë nga qeveria. E bëri Fatmir Mediu dhe sot e ka përsëritur Dashamir Shehi. Arsyetimi është i thjeshtë: votuesit e lanë në opozitë Partinë Demokratike. Votuesit e lanë në pushtet të vetëm Edi Ramën ashtu siç kërkoi gjatë zgjedhjeve. Për këtë arsye PD-së i takon të rimarrë rolin e opozitës, madje si forcë e përgjegjshme që duhet të ishte ta forcojë atë rol. Mirëpo nuk ka sesi të jesh opozitë e besueshme kur vijon të qëndrosh në qeveri.

?Ministrat s?kanë ça bëjnë atje. Atje rrinë kot. Domethënë, në njëfarë mënyre, vënë në dyshim gjithë idenë e koalicioneve me PS-në. Paragjykojnë gjithashtu edhe rolin e opozitës. Çfarë do të bësh në opozitë ti, kur gjysma e qeverisë është e jotja?!?, shprehet Shehi në intervistën për gazetën ?Panorama?.

Kjo situatë kur deputetë apo aleatë të vegjël bëjnë thirrje të tilla kujton ato qëndrimet e dikurshme të Skënder Gjinushit, kundër ndryshimeve në Kushtetutë dhe për pazarin për presidentin konsensual. Qëndrime të drejta por që bien në vesh të shurdhër dhe nuk kanë rëndësi përballë pazarit të kopsitur të dy partive kryesore.

Edi Rama dhe Lulzim Basha po i përmbahen pazarit të 18 majit dhe siç duhet ta kuptojnë të gjithë, konteksti i atij pazari dhe amerikanëve që e financuan, nuk është as stabiliteti dhe as demokracia si aspekt funksional i sistemit. Jo. Është kontrolli i realizuar përmes një pazari të dy njerëzve që kanë nga pas një kompani deputetësh që bëjnë çfarë u thonë. Shihet dita ditës se asgjë nuk mund të lëvizë kryeministrin dhe kreun e opozitës nga pozicioni i marrë më 18 maj; interesi publik jo e jo, por as edhe ndonjë animozitet i presupozuar në opinion. Zgjedhjet e 25 majit? Sa herë ka funksionuar gënjeshtra në këtë vend? Dërgoni ndonjë ankesë për kanalizimet dhe për ujin.

Kjo që po ndodh aktualisht është thjesht shfaqja e masës tumoriale që ka mbërthyer të gjithë ngrehinën: kushtetuta, ligjet, parimet dhe kufijtë, janë letra pa vlerë. Tjetër gjë vlen në këtë që po luhet. Dy biznesmenë të politikës dhe një i tretë në presidencë që vazhdojnë të qetë pazarin e tyre, luftojnë dhe çirren vetëm për të. Asgjë më shumë. Fjala në këtë mesele nuk vlen fare. Qoftë për forcën që këta të tre përfaqësojnë, qoftë edhe se kemi të bëjmë me kategori njerëzore që lëvizin vendit vetëm për atë që u intereson. Pështjellimi i tanishëm thjesht shërben për të kaluar sa më qetë fazën e krijimit të qeverisë së re që do t?u ofrohet shqiptarëve me atë paketim që iu ofrua edhe marrëveshja e 18 majit. Sabiliteti, integrimi etj..

Opozita e Lulzim Bashës do ta gjejë rrugën e përfaqësimit për të hyrë në çorbën e pushtetit me atë pafytyrësi që braktisi çadrën që ngriti vetë. Imagjinoni sesa mund të tallen këta të dy me atë që shohin vërdallë pasi kanë rënë dakord për çdo gjë! Pas tyre një tufë deputetësh që u janë mirënjohës për përfshirjen në lista apo që kanë raporte detyrimesh të tjera. Politika vetë po hyn në një fazë të re edhe në Shqipëri; ajo u përket të pasur-UARVE, askujt tjetër. Të tjerët, le të mbajnë radhën në takime e të bëjnë ndonjë pyetje. Për atë që nuk e pranon këtë logjikë, por bën moral për ligj e institucione, le të shohë sesi disa nuk arrestohen, sesi vendosen listat e kandidatëve, sesi katapultohen nga hiçi të tjerë, apo sesi opozita parlamentare është në pushtet ende. Kuptohet, lufta për standardet vazhdon papushim, po patjetër që edhe një plan miliardash për investime është në fuqi, për ta bërë Shqipërinë në mos si Europa, të pranueshme për Europën./respublika