EKSKLUZIVE-DETAJE/Marinsi amerikan Brandon dhe roli i tij në PD

10 Maj 2017, 09:07, Aktualitet CNA

Një amerikan ish marins, ashtu siç ai prezantohet nga njerëzit e afërt të Lulzim Bashës është pranë PD, nuk pranon të fotografohet njihet me emrin Brandon. Disa ditë më parë në një raport të CityNews amerikani u quajt ?Brawn?, jo për gabimin tonë po për shkak të informacionit që vinte në një takim që ky shtetas kishte bërë në Malësinë e Madhe.

Lajmi u përhap shumë shpejt, shumë njerëz në Partinë Demokratike u shqetësuan, që nga Lulzim Basha, drejtues të lartë të Policisë dhe shumë personazhe politike, të gjithë së bashku nuk e mohonin lajmin, por ishin të shqetësuar për publikimin e tij.

Për më tepër një strukturë, joformale komentuesish dhe sharësish në rrjetet sociale, që paguhet nga familjarët e Bashës në PD, tentoi të bllokonte shkrimin në rrjetet sociale. Lajmi fillimisht u bllokua, më pas ne e ripublikuam. Po pse u shqetësuan zyrtarë të lartë të Partisë Demokratike, të cilët nuk kursyen as telefonatat pranë CityNews, për një lajm që ishte i vërtetë dhe që kishte një foto e dëshmi konkrete.

Në publikimin e tij CityNews thjesht raportonte takimet e marinsit amerikan ?Brawn?, jepte foto dhe fakte pa i hyrë më tej detajeve të cilat i sjellim sot në lidhje me aktivitetin e marinsit amerikan.

Ndryshe nga sa është folur në media, amerikani Brandon, qëndron prej 3 javësh në selinë e PD dhe komunikon vetëm me dy persona, Agest Kopellaj, asistent i Lulzim Bashës, anëtar i Këshillit Kombëtar të PD e Endri Hasa, Shefi i Departamentit të Informacionit në Partinë Demokratike.

Marinsi ka lëvizur në shumë degë të Partisë Demokratike, njeh shumë demokratë, prezantohet si ish ushtarak dhe njeri që po këshillon dhe asiston PD gjatë kësaj kohe. Në takimin e Malësisë së Madhe ku u publikua edhe fotoja nga CityNews, ai u kërkonte të pranishmëve të ishin në selinë e PD, disa orë para takimit dhe aty do të visheshin me një uniformë që ndodhej në selinë e demokratëve.

Marinsi njihet nga të gjithë ish drejtuesit e lartë të Policisë së Shtetit, të cilët qëndrojnë pranë Lulzim Bashës, për më tepër 48 orë më parë, ai ka qenë i pranishëm në mbledhjen e kryesisë dhe grupit parlamentar të PD, zhvilluar në lidhje me protestën e 13 majit.

Zyrtarë të Partisë Demokratike pretendojnë se ai është një këshilltar, por se çfarë bën ky njeri në zonat e veriut në takimet me militantë demokratë, këtë nuk e sqaron ende askush. Partia Demokratike ende nuk ka dhënë një qëndrim zyrtar mbi rolin e marinsit amerikan në PD, përfshirë këtu edhe rolin këshillues apo organizues që dihet dhe njihet nga shumë njerëz pranë Bashës, tashmë pas publikimit të CityNews edhe publikisht, por ende nuk ka një qëndrim zyrtar në lidhje me aktivitetin e tij pranë demokratëve./CityNews