Sajmir Vishaj flet për zbatimin e Vettingut/ Politika s’ka interes, po tentohet shtyrja pas zgjedhjeve

9 Mars 2017, 07:45, Aktualitet CNA

Avokati Sajmir Vishaj mendon se politika nuk ka interes për zbatimin e Vettingut dhe se po tentohet shtyrja pas zgjedhjeve. Sajmir Vishaj, në një prononcim për gazetën ?SOT?, është shprehur se ky proces duhet të shkojë në referendum, pasi politika nuk ka interes të zbatojë Vettingun. Ai shton se gjithçka do të mbetet pas zgjedhjeve parlamentare të 18 qershorit.

?Kur në grupin e ekspertëve nuk kishte dakordësi mes subjekteve politike, kjo reformë do të shkonte drejt dështimit. Dhe në momentin që 140 deputetët votuan një reformë pa e lexuar, kjo do të ndodhte. Palët kujtojnë se subjektet politike bëjnë reformën. Reformën duhet ta bëjnë qytetarët, dhe reforma i shërben qytetarëve dhe jo subjekteve politike. Nesër subjekte politike do të jenë subjekt të arrestimit, prandaj nuk e dëshirojnë Vettingun?.

Duke qëndruar në të njëjtën linjë, ai e konsideron të dështuar procesin e ngritjes së dy komisioneve të Vettingut. Sipas avokatit, përsa kohë nuk do të ketë dakordësi politike, Vettingu do të jetë i dështuar. Vishaj thekson se reforma në drejtësi i intereson vetëm qytetarit, pasi subjektet politike mund të rrezikojnë të bëhen subjekt i arrestimit.

?Ndërsa nuk ka dakordësi, ky proces është i dështuar. Duhet patjetër që kjo reformë të ketë dakordësinë e palëve. Duhet të shkohet në referendum. Duhet të vendosë qytetari, sepse atij i dhëmb më shumë sesa politikanit; politikani do të ruajë statusquonë, kurse qytetari shkon në gjyq për të marrë drejtën dhe merr padrejtësinë. Aktualisht jemi në prag të zgjedhjeve dhe gjithçka do të kalojë në shtator-tetor. Nuk ka asnjë dritë jeshile për ngritjen e institucioneve kushtetuese?, thotë Vishaj.

Në një kohë kur Parlamenti duhet të ngrejë komisionin Ad-Hoc për të zgjedhur 27 anëtarët e Komisionit të Pavarur të Kualifikimit dhe Kolegjit të Apelimit, opozita i shpall bojkot punimeve të Kuvendit. Vishaj deklaron se bllokimi i Vettingut, si rrjedhojë sjell edhe bllokimin e ngritjes së organeve të reja, siç janë KLGJ dhe KLP, të cilat kanë një rol të rëndësishëm në emërimin dhe shkarkimin e individëve në institucionet e drejtësisë.

Ai thotë se zgjidhja e vetme është arritja e dakordësisë, që duhet të kulmojë me ngritjen e komisionit të posaçëm Ad-Hoc. ?Pa u krijuar komisionet e shkallës së parë dhe të dytë të Vettingut, nuk mund të funksionojë asnjë institucion kushtetues, që janë KLGJ dhe KLP, të cilat do të fillojnë të emërojnë ose shkarkojnë personat që mund të jenë të korruptuar nga ana e Vettingut. Nëse nuk ka dakordësi mes palëve, reforma do dështojë?, deklaroi Vishaj. /CityNews