Nga Sonila Meço/ Për propagandën dhe tundimin e papërballueshëm të (vet)censurës

12 Shkurt 2017, 17:00, Aktualitet CNA

Gazetarja Sonila Meço, e cila njihet tashmë për qëndrimet e saj të lira dhe të shprehura haptazi në rrjetet sociale, na sjell në fokus rastin e censurës në art. Ajo sjell rastin e gazetares Elsa Demo, e cila është larguar nga detyra pak kohë pasi ka xjerrë në dritë te diellit fakte të cilat nuk duhet të bëheshin publike. Duke e cilësuar si një propagandë të (vet)censures, kolegia e saj Sonila Meço, shprehet në statusin e saj se ajo i përulet me mirënjohje.

“Për propagandën dhe tundimin e papërballueshëm të (vet)censurës.

Në datë 28 janar shkruaja këtë status:

‘Elsa Demo të përulem me mirënjohje!

Nuk e kam ndjekur ekspozitën e Çmimit Ndërkombëtar Onufri, nuk e njoh mirë përpjekjen e institucioneve shtetërore për të afruar publikun tek arti, sidomos ai pamor.

Por ndërsa ndjek një intervistë të Elsës me drejtuesin e Galerisë Kombëtare të Arteve, e armatosur me informacion, fakte, kulturë, opinione të artikuluara nga njohja e thelle, reaguese dhe e shpejtë, e vëmendshme, e prerë, e pakompromis, ndjehem e aftë të kuptoj edhe unë ç’po ndodh me artin pamor, cenet e administrimit shtetëror, monopolizimin e mundësive nga të njëjtët emra të rreshtuar politikisht, delirin e marrjes së meritave për vetvlerësimin ndaj punës pa përfshirjen e vlerave të vërteta, që burojnë nga arti që krijohet e jo ai që pranohet nga një grusht i hekurt shqyrtarësh oborri.

Po lëngon edhe arti e po bëhet pa asnjë skrrupull, larg vëmendjes sonë…Ndjek Elsën si përjashtimin që përforcon rregullin se në këtë vend mediokriteti nuk njeh asgjë më të lartë se vetja. Mediokriteti feston në gjirizet që ka krijuar vetë, ndërsa mjeshtëria injorohet. Rrofsh o Elsë që u hedh dritë atyre gjirizeve, teksa unë të festoj ty!’

Dhe vetëm pak ditë më pas, Elsën e largojnë nga puna, vetëm pak ditë më pas tek Krasta, Elsa dëshmon se arsyeja për të cilën e falenderoja është mallkimi i saj (dhe të ngjashmëve të saj).

Ama sado më trishton qëndrimi i një aseti si Elsa jashtë makinerisë mediatike, aq më frymëzoi fakti se për censurën e propagandën që po ha kokën e gazetarëve të lirë, shpretkën e xhanin e tyre, u fol sot hapur, fort, pa tundime vetcensure në studion e rëndësishme të një televizioni kombëtar…nga dy gazetarë race!?, përfundon ajo. /CityNews