PKD: PD të reflektojë qëndrimin e saj për Integrimin

8 Nëntor 2016, 15:44, Aktualitet CNA

Partia Demokratike me amendamentin e saj të dorëzuar në parlamentin Europian, me të cilin synohej ndryshimi i dokumentit të përgatitur nga sekretariati i këtij parlamenti ku i kërkohet Komisionit Europian t?i japë këshillit rekomandimin pozitiv për hapjen e negociatave për anëtarësimin me Shqipërinë, tregoi edhe një herë se kjo forcë politike, interesat e saj politikë dhe partiakë i vë mbi interesat e Shqipërisë dhe të qytetarëve shqiptarë.

Për të gjithë qytetarët e këtij vendi, për të gjithë shqiptarët kudo që jetojnë, rekomandimi pozitiv për hapjen e negociatave, përbën një lajm të shumëpritur dhe të gëzuar, madje, për fat të keq, të vonuar. Ky lajm krijon një garanci më shumë se Shqipëria përmes vështirësive të pafundme, të krijuara, jo vetëm nga diktatura e egër dhe izolimi i gjatë, por edhe prej klasës politike që ka qevërisur me mentalitetin e së shkuarës, më së fundi po kthehet aty ku e ka vendin ? në Europën tonë të përbashkët. Kjo ishte ëndrra dhe dëshira e hershme e shqiptarëve.

Me ?E duam Shqipërinë si gjithë Europa? nisi Lëvizja studentore, që u mbeshtet nga qindra mijëra qytetarë në mbarë vendin. Kjo ëndërr e madhe e shqiptarëve, e mbajtur larg nga politikat e mbrapshta, qeverisja e keqe dhe politikanët keqbërës, tashmë bëhet e prekshme, e realizueshme, duke gëzuar zemrat e të gjithëve dhe duke ngjallur shpresat për një të ardhme më të mirë. Përpjekja për ta penguar dhe për ta shtyrë edhe më tutje procesin e integrimit, më shpresën e përfitimeve të vogla politike, është e paparanueshme dhe e dënushme.

Partia Kristiandemokrate dënon me forcë këtë qendrim të Partisë Demokratike, që vjen në kundërshtim me interesat e qytetarëve shqiptarë dhe të Shqipërisë. Askush nuk i fsheh problemet e shumta që kemi me qeverisjen dhe funsionimin e institucioneve demokratike, me korrupsionin dhe krimin e organizuar, me ngadalësinë e reformave dhe proceset zgjedhore të diskutueshme. Por për të gjithë ne është e qartë se afrimi me Europën, dhe hapja e negociatave, kushtëzon qeverisjen më të mirë, zgjedhjet e lira dhe të drejta, forcimin e institucioneve demokratike, thellimin e reformave, rritjen e mireqenies se qytetarëve, luftën e pakompromis me krimin dhe korrupsion. Vonesat me integrimin nuk zgjidhin, por vetëm i thellojnë problemet që kemi si shoqëri dhe si shtet.

PKD i bën thirrje Partisë Demokratike, si forca kryesore politike opozitare në vend, të reflektojë qendrimet e veta dhe të bashkohet me gëzimin e të gjithë shqiptarëve, si dhe të japë kontributin e vet thelbësor në përshpejtimin e procesit të integrimit të Shqipërisë në BE.

Av. Dhimitër Muslia

Kryetar i Partisë Kristian Demokrate