Tre skenarët e Ilir Metës / Nga Elvi FUNDO

21 Tetor 2016, 10:03, Aktualitet CNA

Kreu i LSI-së, Ilir Meta ka vetëm tre skenarë në të ardhmen e tij politike. Skenarë që nuk lindin nga gara për kryetar të LSI-së, pasi edhe kjo forcë politike është po aq e kontrolluar dhe bajraktariste sa dy forcat kryesore në vend. LSI-ja bën sikur ka garë, PS nuk ka garë fare, PD-ja bën garë me fletëvotimet me numër serie dhe zgjedh kryetarin me vota të vjedhura.

Të qëndrojmë te tre skenarët e Ilir Metës.

Skenari i parë dhe më i vështiri për Metën është zgjedhja e tij kryeministër. Kreu i LSI-së do të luftojë fort në zgjedhjet e ardhshme që të shkojë në mbi 300 mijë vota që janë afërsisht sa ato që mori në zgjedhjet lokale dhe një rritje me 40% krahasuar me votat e marra në vitin 2013. Këto 300 mijë vota me një pjesëmarrje në votim me rreth 1,5 milion votues janë 20% e votave totale dhe në formulën e sistemit zgjedhor mund ta çojnë Ilir Metën në 25-30 mandate.

Këto mandate, të bashkuara qoftë me një minimum të PD-së së Bashës me 50 mandate, bashkë me aleatët e saj, e bëjnë Ilir Metën kryeministër të vendit. Një ofertë e tij për Bashën do të ishte shpëtimi për të dy. Kreu i opozitës nuk duket të ketë komplekse, mjafton që Meta ti bashkohet dhe të dy rrëzojnë Ramën. Dhe LSI nuk e ka për herë të parë ?dashurinë? për PD-në.

Skenari i dytë është që Ilir Meta të zgjidhet president, një sjellje publike prej shumë e shumë muajsh.

Kreu i LSI-së është mjaft racional me diplomacinë e tij, i kujdesshëm në marrëdhëniet me ndërkombëtarët, vizita e fundit në Greqi tregoi se ai ishte mendjehapur dhe sjellja ishte prej një lideri europian për çështje të cilat ishin plagë të thella dhe mund të shkaktonin debate të forta. Këtë sjellje Meta e ka edhe në politikën shqiptare dhe artikulimin e tij publik. Ai përpiqet të sillet si njeriu mbi palët, që çtensionon politikën dhe sjell konsensusin. Ilir Meta po ndërton imazhin e tij si president në politikë brenda dhe jashtë Shqipërisë, njeriu mbi palët, i kujdesshëm në qëndrimet diplomatike dhe si të tillë zor se Basha nuk do ta pranonte për president kur e ka patur zv/kryeministër dhe bashkë kanë qenë pjesë e qeverisë Berisha. Zgjedhja si presidenti nuk do ta nxirrte Ilir Metën në pension, por do ti jepte mundësi që në mandatin e dytë të Ramës të merrte më pak kosto nga lëvizjet e forta të kreut të qeverisë.

Dy skenarët e mësipërm vijnë njëri para dhe tjetri pas zgjedhjeve, por është edhe një skenar i tretë, që Meta të mos ketë mandatet e nevojshme për tu bërë kryeministër, ndërkombëtarët të mos e pranojnë si president dhe të jetë politikani i parë që ndëshkohet për shkak të videos Meta-Prifti duke rihapur këtë çështje. Gjë që mund të bëhet pas reformës në drejtësi me mbështetjen e fortë të amerikanëve.

Ilir Meta ndoshta është i vetmi politikan që përpara ka një të ardhme të trefishtë, nga ?mbretërimi? në ?burgosje?. /Shkruar për Citynews